Адлия вазирлиги ер участкалари олиб қўйилганда қандай компенсация тўлаш кераклигини тушунтирди
Тошкент. 29 июль. ЎзТАГ – Ўзбекистон Адлия вазирлиги ер участкалари олиб қўйилганда қандай компенсациялар тўлаш кераклигини тушунтириб берди, дея хабар беради Ўзбек телеграф агентлиги (ЎзТАГ).
Бу Вазирлар Маҳкамасининг 2006 йил 26 майдаги "Давлат ва жамоат эҳтиёжлари учун ер участкалари олиб қўйилиши муносабати билан фуқароларга ва юридик шахсларга етказилган зарарни қоплаш тартиби тўғрисидаги низомни тасдиқлаш тўғрисида"ги қарори билан белгиланади.
"Ер участкаларини олиб қўйиш қуйидаги турдаги компенсацияларни тақдим этиш шарти билан амалга оширилади: 1-фуқароларга уй-жой майдонининг ижтимоий нормасидан кам бўлмаган бошқа тенг қийматли обод тураржойни мулк қилиб бериш ва дов-дарахтлар қийматини тўлаш, 2-бузилган уйлар, бошқа бинолар, иншоотлар ва дов-дарахтларнинг қийматини фуқароларга тўлаш, шунингдек, ер участкасининг олиб қўйилиши муносабати билан мулкдорларга етказилган зарарни қоплаш, 3-ер участкасини ўзлаштириш даврида икки йилгача бўлган муддатга ижара шартномаси шартлари асосида вақтинчалик уй-жой бериб, бузилаётган уйлар (квартиралар), иморатлар, иншоотлар ва дов-дарахтларнинг бозор қиймати тўлиқ тўланган ҳамда ер участкасининг олиб қўйилиши муносабати билан мулкдорларга етказилган бошқа зарарлар тўлиқ ҳажмда қопланган ҳолда, фуқароларга якка тартибда уй-жой қуриш учун белгиланган норма доирасида уй-жой қуриш учун ер участкаси берилади", – дейилади хабарда.
Шунингдек, қарорда юридик шахсларга давлат ёки жамоат эҳтиёжлари учун ер участкаси олиб қўйилиши муносабати билан етказилган тенг мол-мулк ёки кўчмас мулкнинг бозор қиймати ҳамда зарарнинг ўрнини қоплаш, давлат ёки жамоат эҳтиёжлари учун ер участкасининг олиб қўйилиши оқибатида етказилган зарарларнинг тўлиқ ҳажмда қопланиши, фуқаролар ва юридик шахсларга тегишли бўлган уй-жойлар, бино ва иншоотлар бузиб ташланиши лозим бўлган янги жой, шунингдек, етказилган зарарни қоплаш, ерларини олиб қўйилганлиги муносабати билан эгаларига келтирилган зарар тўланади.
Бундан ташқари, фуқаролар ва юридик шахсларга янги жойларда уй-жойлар, бинолар қуриш ва мулкка ўтказиш, шунингдек, ер участкасининг олиб қўйилиши муносабати билан мулкдорларга етказилган зарарни қоплаш кўзда тутилган.
Сурат манбаи: estatelegal.ru
