Агар Криштиану Роналду имкониятининг 100 фоизи ва ундан ҳам яхши ўйнаса, унда Португалия термасининг Германияга қарши имкониятлари юқори бўлади

Тошкент. 17 июн. ЎзТАГ – Агар Португалия терма жамоаси хужумчиси Криштиану Роналду имкониятининг 100 фоизи ва ундан ҳам яхши ўйнаса, унда Португалия термасининг Германияга қарши имкониятлари анча юқори, дея хабар беради Ўзбек телеграф агентлиги (ЎзТАГ) Бразилиядаги футбол бўйича жаҳон чемпионатининг бешинчи куни учрашувлар олдидан.
Айни пайтда ҳар икки жамоанинг ҳимоясида рақибга йўқ жойдан муамо туғдириши мумкин бўлган ўйинчилар мавжуд. Булар марказий ҳимоячилар Бруну Алвеш (Португалия) ва Пер Мертезакер (Германия).
Португалия термасининг Варела-Поштигу-Роналду ва Моутиньюлардан иборат хужум чизиғи ҳар қандай вазифаларни уддалашга қодир. Роналдуни биттага битта чиқиб бартараф қилиш мумкин дейувчилар кўп бўлишига қарамасдан, бунга ишониш қийин. Буни фақат иккита бўлиб, ёки учта бўлган ҳолда бажариш мумкин шекилли. Шу сабабли Криштиану ўзи истаган услубда ўйнай олса, жамоадошлари доим яхши имкониятлар оладилар.
Германия термасининг Кроос-Озил-Мюллер учлиги ҳамда Мирослав Клозедан иборат хужумчилар гуруҳи ҳам ўта ҳавфли. Лекин “Бавария” ва “Арсенал”нинг юқорида саналган ишонган уч ўйинчисининг ҳеч бири Роналдунинг иқтидорига эга эмас. Яна бир немис ўйинчиси, 36 ёшли марказий хужумчи, “Лацио” ўйинчиси Клозени тушуниш янада қийинроқ. Тўғри, у бош билан яхши ўйнайди, лекин португалия ҳимоячилари Алвеш ва Пепелар ҳам ундан қолишишмайди.
Немисларнинг ўрта линияси анча кучли (Лам-Хедира ва юқорида саналган учовлон ҳамда Клозе), шу сабабли улар тўпни кўпроқ ўзларида ушлаб турадилар дейиш мумкин. Португалларнинг Мейрелеш-Карвалью-Моутиньюдан иборат учлиги бу борада немислардан ўзишлари гумон.
Лекин кўпинчи тўпни ўзида кўпроқ ушлаб туриш ўйинда ғалаба қозонишни англатмайди.
Агар португалияликлар ҳимоядан хужумга тезкор ўтиб турадиган бўлишса, Роналду эса ўз ўйинини кўрсатса, Португалия термасининг имкониятлари юқори бўлади. Лекин ҳар қандай бошқа ҳолатда немислар енгадилар.