“Ahbor-Reyting” “Ўзсаноқурилишбанк” АТ ўзбек банкининг рейтингини янгилади

Тошкент. 7 июл. ЎзТАГ – 2015 йил якунлари бўйича “Ahbor-Reyting” рейтинг агентлиги “Ўзсаноқурилишбанк” АТБ миллий шкала бўйича кредит рейтингини “Барқарор” прогнози билан “uzA+” даражасида тасдиқлади, деб хабар беради Ўзбек телеграф агентлиги (ЎзТАГ).

Банкдан хабар қилишларича, ушбу рейтинг молия муассасасининг бозордаги етакчи ўрни, таваккал-менежментнинг яхши даражаси, барқарор юксалиб бораётган молиявий натижаларини акс эттиради. Шу билан бирга, рейтинг кредит портфелининг ўсиши ва у билан боғлиқ кредит таваккалчиликларининг кўпайиши, юқори бўлмаган диверсификация даражасини ҳам юзага чиқарди.

Банк даромад келтирувчи активлари 2014 йил якунлари билан солиштирганда 14,57% кўпайиб, банк активларининг 91,51% етган. 2016 йил I чораги якунлари бўйича ушбу кўрсаткич йил бошидан бери 1,78% ошиб, барча активларнинг  91,57% ташкил қилган.

2015 йил якунлари бўйича банкнинг соф кредит портфели 7,3 трлн сўмни ташкил этди (+17,36%). 2016 йил якунлари бўйича банкнинг соф кредит портфели йил бошига солиштирганда 1,78% кўпайди ва 7,4 трлн сўмга ёки барча активларнинг 82,84% етган.

 Банкнинг ўз капитали 786,8 млрд сўмга (+17,23%) етган. Айни пайтда, ушбу кўрсаткич 2016 йил I чораги якунлари бўйича йил бошига солиштирганда 13,42% кўпайиб, 892,4 млрд сўмни ташкил қилган.