Алишер Абдуалиев харьковлик тадбиркорларни Ўзбекистондаги йирик лойиҳаларни амалга оширишда иштирок этишга чақирди

Тошкент. 11 ноябр. ЎзТАГ – Ўзбекистоннинг Украинадаги элчиси Алишер Абдуалиев харьковлик тадбиркорларни Ўзбекистондаги йирик лойиҳаларни амалга оширишда иштирок этишга чақирди, деб хабар беради Ўзбек телеграф агентлиги (ЎзТАГ).  

Бу чақириқ унинг Харьков вилояти маъмурияти раҳбари Юлия Светличная билан учрашувида айтилди.

UzDaily.uz маълумотига кўра, А.Абдуалиев Ўзбекистон илмий доиралар ва корхоналарни энергетика, қайта ишлаш саноати ва бошқа соҳалардаги йирик лойиҳаларни амалга оширишга жалб қилишдан манфаатдорлигини айтди.

“Биз 2030 йилгача қиймати $60 млрдлик лойиҳаларни амалга ошириш ниятидамиз. Бу йўналишлар биз учун жуда қизиқ ва харьковлик тадбиркорлар уларда иштирок этишлари мумкин”, - деб таъкидлади Абдуалиев.

Дипломат ҳамкорликнинг бир йўналиши сифатида Ўзбекистондан Харьков вилоятига маҳсулот экспорти эканлигини, томонлар Тошкент ва вилоят ўртасида темир йўл қатновини қайта тиклаши зарурлигини айтиб ўтди.

 Шунингдек, элчи Ўзбекистон таълим йўналишидаги ҳамкорликка ҳам қизиқаётганлигини таъкидлаб, Ўзбекистонлик 500 талаба харьков ОТМ таълим олаётганлигини, бу сонни кўпайтириш учун барча имкониятлар борлигини қўшимча қилди.