Андижон вилояти банкларида пул ўтказмалари бериш билан боғлиқ мураккабликлар бор

Тошкент. 9 август. ЎзТАГ – Андижон вилояти банкларида фуқароларга хориждан  пул ўтказмаларини бериш билан боғлиқ мураккабликлар кузатилмоқда. Банк вакиллари пул ўтказмалари бериш билан боғлиқ қийин вазиятни тасдиқладилар. Уларнинг сўзларига кўра, Тошкентдан хорижий валюта унча кўп миқдорда етказилмаяпти, Ўзбекистонга пул ўтказмалари оқими эса – ошган, деб хабар беради centralasian.org.

Шахрихон туманида яшовчи Акмалнинг сўзларига кўра, у Россияда пул ишлаб юрган акаси жўнатган пулни олиш учун 3 кун сарфлашига тўғри келган. “Жума куни акам онамнинг даволанишига пул жўнатди. Мен уни олиш учун жума куни банкка бордим, лекин банк ишламаётган экан. У ердагилар менга эртага ишлашларини айтишди. Шанба куни яна банкка бордим, лекин эшиклар ичкаридан ёпиқ эди. Бир соатдан кейин банк ходими чиқиб, бугун банк ишламаслиги, кетишимизни айтди. Мен Андижонга боришимга тўғри келди, бирнеча банкларга бордим, уларнинг бари ёпиқ эди”, - деди у.

У душанба куни “Ипак йўли” банкининг Андижондаги филиалида 10 соат навбатда турган ва шундан кейингина Россиядан пул ўтказмасини олишга муваффақ бўлган.

Infinbankнинг вилоят филиали мутахассиси, ўзини Фаррухбек деб таништирган ходим банкларнинг вилоят филиаллари олдида кишилар тўпланиб қолгани ҳақидаги маълумотни тасдиқлади. “Бунга икки сабаб бор. Биринчиси, ёзда Ўзбекистонга пул ўтказмалари оқими ошади. Олувчилар ҳам кўпаяди. Иккинчидан, ҳозирда шаҳарга туманлардан пул олиш учун кўпчилик кела бошлади. Сабаби – туман филиаллари пул ўтказмалари беришни тўхтатдилар. Шунинг учун ҳам кўпчилик шаҳарга отланган”, - деб тушунтирди мутахассис.