“Ангрен-Поп” темир йўл линиясида коммуникациялар ва тоннелдаги темир йўл полотносини ўтказиш ишлари қолди

Тошкент. 29 феврал. ЎзТАГ – “Ангрен-Поп” темир йўл линиясида коммуникациялар ва тоннелдаги темир йўл полотносини ўтказиш ишлари қолди, деб хабар беради Ўзбек телеграф агентлиги (ЎзТАГ).

“Ўзбекистон темир йўллари” АЖ ахборот хизматининг таъкидлашича, “19 километрлик темир йўл тоннелини ўз ичига олган мазкур улкан лойиҳа “Ўзбекистон темир йўллари” акциядорлик жамиятининг тажрибали ва малакали темирйўлчилари томонидан Хитойнинг “China Railway Tunnel Group” компанияси билан ҳамкорликда амалга оширилмоқда”.

Хабарда айтилишича, тоннель қурилиши мураккаблиги бўйича жаҳонда биринчи саккизталикдан, узунлиги бўйича ўн учталикдан жой олган, МДҲ мамлакатларидаги ягона ноёб қурилиш иншооти ҳисобланади.

“Бугун Қамчиқ тоннели қурилишида жуда катта тарихий воқеанинг гувоҳи бўлиб турибмиз. Асосий тоннелнинг иккала томонидан бурғулаш, ковлаш ишлари тугатилиб, туташтирилди. Айни кунда эса пардозлаш ишлари давом этаяпти. Бугунги кунгача тоннелнинг 85%да пардозлаш ишлари бажарилди. Энди эса тоннелда пўлат излар ётқизиш ва электрлаштириш, коммуникация ишларини ўтказилади”, - деб таъкидланади хабарда.

Таъкидлаш зарурки, узунлиги 123,1 кмдан иборат бўлган мазкур лойиҳанинг тоннелдан ташқари 104 километрида барча қурилиш ишлари 2015 йил август ойининг охирида якунланган эди.