“Ангрен-Поп” темир йўл линиясида тоннел қурилиши бошланди
Тошкент. 19 январ. ЎзТАГ – Хитойнинг “China Railway Tunnel Group” компаниясининг 1 мингдан ошиқ мутахассислари ва 500 маҳаллий темирйўлчилар ҳозирда узунлиги 19-километр бўлган тоннел қуриш билан шуғулланмоқдалар. Ушбу темир йўл тоннели ҳам янги “Ангрен-Поп” темир йўл линиясининг бир қисми бўлади, дея хабар қилади Ўзбек телеграф агентлиги (ЎзТАГ).
“Ўзбекистон темир йўллари” ДАТЙКдан хабар беришларича, ҳозирга қадар 7,3 км тоннел бетон қилиб бўлинди. Жами ушбу ишларда Ўзбекистонлик 3 мингдан зиёд темирйўлчилар қатнашмоқда. Линиянинг ноёблиги шундаки, у денгиз сатҳидан 2,2 минг метр баландликда бўлган Қамчиқ тоғ довонидан ўтади. Ҳозиргача Фарғона водийси ва мамлакатнинг қолган ҳудудлари бир бири билан фақат ҳаво транспорти ва автомобил йўли билан боғланган.
Янги темир йўл линиясининг умумий узунлиги 123,1 км. Тоннелдан ташқари, бу ерда 285 сунъий объектлар, 22 кўприк, 6 йўл ажратгич қурилади. Яна олти темир йўл станцияси ва иккита вокзал қуриш ҳам режалаштирилган.
Янги магистралда қуриб битказилган объектлар ҳам мавжуд. Улар орасида Поп туманида қурилаётган “Темирйўлобод” станцияси ёнидаги юк терминалини кўрсатиш мумкин. Бу ерда қурилиш ишлари 2015 йилнинг охирига қадар давом этади. 2016 йилда эса бутун тегишли инфраструктура қурилиши якунига етказилади.
Тоннел қурилишини 2016 йил июлда якунлаш режалаштирилган.
