Ангрен-Поп темир йўли Осиёдаги энг хавфсиз йўллардан бири бўлади

Тошкент. 2 апрель. ЎзТАГ –Ангрен-Поп темир йўли Осиёдаги энг хавфсиз темир йўллардан бири бўлади, чунки асосий тоннелга параллел равишда заҳира тоннели ҳам қурилади, дея хабар беради Ўзбек телеграф агентлиги (ЎзТАГ).
2013 йилнинг сентябрида “Ўзбекистон темир йўллари” ДАТЙК хитойнинг “China Railway Tunnel Group” компанияси билан қиймати $455 млнлик тоннелни қуриш бўйича шартнома имзолади. Шартномага биноан хитойлик компания поездларнинг ҳаракатланиши учун узунлиги 19 км бўлган тоннелни, шунингдек, турли ноодатий вазиятларда зарур бўлиб қоладиган заҳира тоннелини ҳам қуради.
Бундан ташқари, заҳира тоннели бирқатор қўшимча вазифаларни ҳам бажаради. Буларга ёнғин ва бошқа фавқулодда ҳолатларда одамларни чиқариш, транспорт, вентиляция ва сувни чиқариб юбориш, кабеллар ўтказиш каби қатор вазифалар киради.
Эслатиб ўтамизки, электрлашган “Ангрен-Поп” темир йўлининг умумий узунлиги 125 кмга тенг. Уни 2016 йил ўртасида қуриб битказиш режалаштирилган. Лойиҳанинг тахминий қиймати $2 млрд.
Ҳозирга қадар Тошкент Фарғона водийси билан Қамчиқ довонидан ўтувчи автомобиль йўли орқали боғланган. Қиш пайтлари бу йўлда юриш қийинлашади.