Арманистонда полиция Еревандаги намойишчиларни сув пуркагичлар билан тарқатди, ўнлаб кишилар қўлга олинган
Тошкент. 23 июн. ЎзТАГ – Арманистонда полиция Ереван марказидаги ҳукуматнинг 1 августдан электроэнергия тарифларининг оширилишига қарши чиққан намойишчиларни сув пуркагичлар билан тарқатди, деб хабар қилади “Росбалт” АА.
Ўтган кеча сув пуркагичлар ёрдамида акция иштирокчилари Маршал Баграмян проспектидан опера театри томонига суриб ташланган. Ўнлаб кишилар, жумладан, журналистлар қўлга олинган.
Хусусан, ОАВ “Гала” ва “Ньюз” интернет-нашрлари, шунингдек, “Озодлик” радиостанциясининг арман хизмати мухбири ҳам қўлга олинган.
Баъзи маълумотларга кўра, ҳозирда Ереван маркази ҳаракат учун тўлиқ очилган. Кўчада кўплаб полициячилар ва махсус техникаларни кўриш мумкин.
Намойишчилар билан узоқ давом этган музокаралар ҳеч қандан натижа бермагани сабабли намойиш куч билан тарқатилган.
Эслатиб ўтамизки, 19 июн куни Ереван марказидаги “Озодлик” майдонида электроэнергия нархларининг оширилишига қарши “Талончиликка йўл қўймаймиз” шиори остида намойиш бошланган эди. Кечга яқин, акция иштирокчилари қўйган ультиматум муддати тугаганидан кейин улар Арманистон президенти маъмурияти биносига қараб йўл олдилар. Аммо намойишчилар полиция томонидан бинога яқин жойда, Маршал Баграмян проспектининг бошида тўхтатилган. Шунда намойишчилар Ёзувчилар уйи ёнида ўтирган ҳолда акция уюштирганлар. У 11 соат атрофида давом этган.
Ўтган ҳафта Арманистон жамоат хизматларини назорат қилиш давлат комиссияси Арманистонда 1 киловатт электроэнергия баҳосини 6,93 драмга (475,03/$1) кўтариш ҳақида қарор қабул қилган эди. Янги тариф 1 августдан бошлаб амал қилади.
