Қаршилик математик ўз ишига изоҳ беришдан бош тортди
Тошкент. 14 апрел. ЎзТАГ – Қаршилик математик Шокир Давлатов ўз ишига изоҳ беришдан бош тортди, деб хабар теради ЎзТАГ.
“Тўғриси, менинг илмий ишим ОАВ диққатига тушишни истамас эдим. Ҳозир уни ўрганиш ва маълумотларни аниқлаштириш ишлари олиб борилмоқда. Мен илмий ишим дунё илмий ҳамжамияти томонидан тан олинмасдан туриб, у ҳақида жамоатчиликка гапириб беришни истамайман. Фақат шундан кейин у ҳақида батафсил сўзлаб беришим мумкин”, - деди Давлатов UZ24 нашри мухбирига.
Олдин хабар қилингани каби, Қарши давлат университети математиги Ш.Давлатов мингйилликнинг олтинчи муаммоси бўлган Навье-Стокс мисолининг ечимини топган деб тахмин қилинмоқда, У ўз ечимини АҚШ Корнелль университети сайти arXiv.orgда жойлаштирган. Илмий иш Навье-Стокс тенгламасининг ягона силлий ечими мавжудлигини исботлашга бағишланган бўлиб, рус тилида ёзилган.
