“Асака” банки Туркия Экспорт-импорт банкининг кредит линиясини жалб қилди

Тошкент. 3 май. ЎзТАГ – Ўзбекистоннинг “Асака” акционерлик тижорат банки ва Туркиянинг Экспорт-импорт банки ўртасида қиймати $24 млнлик кредит линияси бўйича шартнома тузилди, деб хабар беради Ўзбек телеграф агентлиги (ЎзТАГ).

Келишув Туркия Республикаси Президентининг Ўзбекистон Республикасига давлат ташрифи доирасида Тошкент шаҳрида ўтказилган ўзбек-турк бизнес-форумида тузилди.

Тузилган битим доирасида Туркия Республикасидан технологик ускуналар ва хизматларни етказиб бериш кўзда тутилган, қайтариш муддати 10 йилгача бўлган кичик бизнес ва хусусий тадбиркорлик субъектларининг лойиҳаларини молиялаштириш режалаштирилмоқда.

Мазкур битим бўйича давлат кафолати тақдим этилиши кўзда тутилмаган.

Эслатиб ўтамизки, Туркия Экспорт–импорт банки 1987 йилда ташкил топган бўлиб, Туркия Республикасининг экспортни рағбатлантирувчи ягона давлат банки ҳисобланади.

Туркия Экспорт–импорт банкининг асосий вазифаси ташқи савдони рағбатлантириш, шунингдек, хорижда фаолият юритаётган турк компанияларини қўллаб-қувватлашдан иборатдир.

Сурат манбаи: http://rusnext.ru/news/1519572877