Қашқадарёда текстиль ишлаб чиқариши кенгайтирилади
Тошкент. 9 феврал. ЎзТАГ – Қашқадарёдаги “ЛТ Текстиль Интернейшнл” хорижий корхонаси хитойлик инвесторлар иштирокида янада ривожлантирилади, деб хабар беради Ўзбек телеграф агентлиги (ЎзТАГ).
“Ўзтўқимачиликсаноат” уюшмаси вакилларининг “Жингшенг груп” (Хитой) компаниясининг раиси Пан Суепинг билан учрашувида ана шу тўғрисида сўз кетди.
Уюшма маълумотига кўра, учрашув 2018 йилнинг январи охирида Қашқадарё вилояти Қарши туманида “ЛТ Техтиль Интернейшнл” хорижий корхонасида бўлиб ўтди.
Ташриф доирасида хорижий корхонанинг кейинги босқичига тамал тошини қўйиш маросимида ташкиллаштирилди. Ушбу тадбирда Қашқадарё вилояти хокимияти, “Ўзтўқимачиликсаноат” уюшмаси ҳамда бир қатор ташкилотлар вакиллари иштирок этдилар.
Пан Суепингнинг сўзларига кўра, хорижий корхонада йигирув фабрикаси кенгайтирилиб, Бельгиянинг “Пиканол” компаниясининг замонавий тўқувчилик машиналарини ўрнатган ҳолда тўқувчилик ишлаб чиқариш лойиҳаси амалга оширилади. Ушбу мақсадда $100 млндан зиёд тўғридан-тўғри хитой сармоясини киритиш режалаштирилмоқда.
Шу билан бирга, Хитой компанияси раиси Тошкент вилояти ҳудудида юқори технологияга эга тўқимачилик ва индустриал паркини ташкил этиш масаласи ишлаб чиқилаётганини хабар қилди. Бунда пахтани қайта ишлашнинг тўлиқ циклини ўз ичига олган тўқимачилик корхонаси, машинасозлик, меҳмонхона комплекслари, ўқув ва бизнес марказлари лойиҳалари 5 йил давомида босқичма-босқич амалга оширилиши режалаштирилмоқда.
Сурат манбаи: http://www.yarnsandfibers.com/news/textile-news/uzbekistan-trying-move-away-raw-cotton-increase-textile-production
