Асли келиб чиқиши Ўзбекистондан бўлган тадбиркор Forbes журналининг энг бой россияликлар рейтингида 3-ўринни олди

Тошкент. 20 апрел. ЎзТАГ – Асли келиб чиқиши Ўзбекистондан бўлган россиялик тадбиркор Алишер Усмонов $14,2 млрд бойлик билан Forbes журналининг 2015 йилдаги энг бой россияликлар рейтингида 2 ўринга пастлаб, 3-ўринни олди, дея хабар беради Ўзбек телеграф агентлиги (ЎзТАГ).

Рейтинг етакчиси “Норникел” раҳбари Владимир Потанин бўлди. Унинг бойлиги Forbes томонидан $15,4 млрд деб баҳоланмоқда. Иккични ўринда “Альфа-Групп” консорциуми кузатув кенгаши раиси Михаил Фридман ($14,6 млрд).

Шунингдек, биринчи ўнталикка “Ренова” ширкати эгаларидан бири Виктор Вексельберг ($14,2 млрд), “Северстал” бош директори Алексей Мордашов ($13 млрд), “Лукойл” президенти Вагит Алекперов ($12,2 млрд), “Новатэк” бошқаруви раиси Леонид Михельсон ($11,7 млрд), НЛМКнинг асосий акционери Владимир Лисин ($11,6 млрд), Volga Group эгаси Геннадий Тимченко ($10,7 млрд) ва “Онэксим” гуруҳи эгаси Михаил Прохоров ($9,9 млрд) кирди.

“Ўтган рейтинг эълон қилинганидан бери Россияда долларли миллиардерлар сони 111тадан 88тагача озайди. Улардан 19 таси таназзулга қарамасдан бойлигини кўпайтиришга эришди. 200 энг бой россияликларнинг бойлиги 2014 йилдаги $481 млрддан 2015 йилда $408 млрдга қадар камайди. Рейтингга кириш учун камида $400 млнга эга бўлиш зарур”, - деб таъкидланади 200 энг бой россияликлар ҳақидаги мақолада.

Эслатиб ўтамизки, Алишер Усмонов уч йил кетма-кет россиянинг энг бой тадбиркори, шунингдек, 2014 йил декабрда Forbes версияси бўйича йил тадбиркори деб топилган эди.