AusOpenнинг иккинчи доирасида Ўзбекистоннинг биринчи ракеткаси дунёнинг иккинчи ракеткаси билан учрашиши мумкин
Тошкент. 16 январ. ЎзТАГ – AusOpenнинг иккинчи доирасида Ўзбекистоннинг биринчи ракеткаси Денис Истомин дунёнинг иккинчи ракеткаси Новак Жокович билан учрашиши мумкин, деб хабар беради Ўзбек телеграф агентлиги (ЎзТАГ).
Бунинг учун 117-поғонада бўлган 30 ёшли ўзбек теннисчиси дунёнинг 170- ракеткаси, 32 ёшли хорват Иван Додигани енггиши керак. Ҳозирча уларнинг шахсий учрашувлари ҳисоби 2:2га тенг. Денис хорватни Астана ва Тошкентда 2007 ва 2016 йилларда енгган бўлса, Иван 2013 ва 2015 йилларда Истборн ва Римдаги турнирларда Денисни мағлуб қилган.
2017 йилнинг илк турнири бўлган Australian Open қаттиқ юзали кортда ўтказилмоқда.
Новак Жоковичга эса қуръада омад кулиб боқмади. Унинг рақиби 33 ёшли испан Фернандо Вердаско бўлиб, АТР рейтингининг 40-ўрнида ва шунга қарамай барча учун ўта мураккаб рақиб ҳисобланади.
Лекин Новак Жоковичнинг имкониятлар баланд деб баҳоланмоқда. Юқоридаги теннисчиларнинг шахсий учрашувлари ҳисоби 9:4. Вердаско омади чопган 2005, 2006 ва 2010 йилларда кўпроқ ғалаба қилган бўлса, Жокович 2013-2017 йиллар орасида Фернандога бир марта ҳам ютқазмаган.
Эслатиб ўтамизки, теннис бўйича Австралиянинг очиқ чемпионати (Australian Open Tennis Championships) – Катта Дубулға туркумига кирувчи тўрт турнирдан биридир. У Мельбурн шаҳрида маҳаллий “Мельбурн Парк” мажмуи кортларида ўтказилади. Икки ҳафта давом этувчи мусобақада катталар ўртасида беш тоифада, катта юниорлар ўртасида тўрт тоифада ғолиблар аниқланади.
Australian Open-2017нинг соврин жамғармаси 50 млн австралия долларига ($36,2 млн) тенг. Эркаклар ва аёллар ўртасида ғолиблар $2,68 млндан оладилар.
