“Барселона” Мюнхенда керагича гол уриб, ўйинни бой берди, лекин финалга чиқди

Тошкент. 13 май. ЎзТАГ – Тўлқин Ташимов. “Барселона”нинг Лионель Месси, Луис Суарес ва Неймардан иборат учлиги Мюнхенда “Бавария” дарвозасига керагича гол уриб, ўйинни 2:3 ҳисобида бой берди, лекин финалга чиқди, деб хабар қилади Ўзбек телеграф агентлиги (ЎзТАГ) УЕФА Чемпионлар лигаси яримфинал жавоб ўйини ортидан.

Тўғрисини айтсам, биринчи яримфинал ўйинидан кейин агар майдонга Роббен ва Риберидан иборат бавария реактив қанот ўйинчилари тушмаса, немис клуби “Барселона”дан ўта олмайди, деб ўйлаган эдим.

Нега дейсизми?

Умид қиламанки, кўпчилик биринчи ўйинни кўрган ва каталонияликлар, хусусан, Месси қандай фантастик футбол намойиш қилганини яхши эсласа керак. Унинг немислар ҳимоячиси Боатенгни моҳирлик билан алдаб ўтиб, тўпни Нойердан осонлик билан ошириб бергани немисларга кучли қанотларсиз ушбу ўйинда ҳеч бир имконият йўқлигидан далолат берган эди.

Шу сабабли “Бавария” ҳимоячиси Бенатия биринчи голни уриб, майдон эгалари олдинга чиққанида (1:0) пинагимни ҳам бузганим йўқ. Чунки “Альянц Арена”даги ўйиннинг бошиданоқ барселона суперучлиги ҳамма нарсага қодирлиги кўриниб турган эди. Бу ўйинда исботини ҳам топди. Майдон ўртасида тўпни олган Месси тўпни Суаресга фантастик равишда икки ҳимоячи орасидан етказиб берди, у эса, ўз навбатида, тўпни дарвозага тепмасдан, Неймарга оширди. Бразилиялик эса коптокни худди машқдаги каби “Бавария” дарвозасига жойлаб қўйди.

Шунинг учун ҳам Бенатиянинг голидан кейин пинагимни бузганим йўқ.

Месси-Суарес-Неймар ушбу ўйинда бор кучи билан ўйнамасаларда, баварияликлар ҳимоясини осонлик билан ёриб ўтдилар. Демак, “Барселона”нинг бор кучи немислар билан ўйинда ҳатто бутунлигича ҳам ишлатилмади.

Кейинчалик, Неймарнинг иккинчи голи, баварияликлар – Левандовски ва Мюллерларнинг голлари билан ҳисоб 3:2 ҳисобига “Бавария” фойдасига ҳал бўлди, лекин Чемпионлар лигаси финалига “Барселона” чиқди.

Қизиғи, 1:1 ҳисобидаёқ туриннинг “Ювентус” ва мадриднинг “Реал” жамоалари барселона суперучлигига қарши қанчалик имкониятга эга, деб ўйлай бошладим. Лекин бу ҳақида кейинроқ – пайти келганда гаплашамиз…