Беш мамлакат мусиқачилари Ўзбекистондаги жаз фестивалида қатнашадилар

Тошкент. 8 апрел. ЎзТАГ – Тошкентда 8 апрелда бошланадиган Халқаро жаз фестивалида Ўзбекистон, Латвия, Ҳиндистон, АҚШ, Франциялик жаз усталари иштирок этадилар. Бу ҳақида яқинда бўлиб ўтган матбуот анжуманида маълум қилинди, дея хабар беради Ўзбек телеграф агентлиги (ЎзТАГ).

Мухбиримизнинг берган маълумотларига кўра, фестивал доирасида 9 апрелда Ари Роланднинг (АҚШ) жаз квартети концерт беради, 20 апрелда маҳаллий гуруҳларнинг, жумладан, “Jazzirama” гуруҳининг чиқишлари бўлиб ўтади, 24 апрелда Ботир Зокиров номидаги Ўзбекистон жаз оркестри концерти, 30 апрелда Пьер де Бетманн (Франция) ва Ўзбекистон жаз оркестрининг қўшма концерти, 6 майда эса Латвиялик Ричард Залупенинг “Ксилен Трио” гуруҳи чиқишлари бўлиб ўтиши кутилмоқда.

Шунингдек, 12 апрелда “Туркистон” Санъат саройида Ари Роланднинг Жаз квартети концерт беради, унинг учинчи қисмида ўзбек жамоалари иштирокида жем-сейшен (биргаликдаги чиқишлар) уюштирилади.

Ҳиндистондан фестивалда Sitar Fusion гуруҳи қатнашиб, классик ва фольклор композицияларини ижро қилади.

Маълумот ўрнида, мазкур жаз фестивали ЮНЕСКО шафелигида ўтказилмоқда. Унинг ўтказилиши 30 апрелда нишонланадиган Халқаро жаз кунига бағишланган.