Бир ҳафтада “Тошкент” РФБ 518,5 млн сўмлик 2,8 млн дона акция сотилди

Тошкент. 19 декабр. ЎзТАГ – 2016 йилнинг 12-16 декабрида “Тошкент” Республика фонд биржасида (РФБ) 12 акционерлик жамиятининг қимматли қоғозлари билан 57 олди сотди битимлари тузилди. Натижада 2,8 млн дона акция 518,5 млн сўмга сотилди, деб хабар беради Ўзбек телеграф агентлиги (ЎзТАГ).

Ҳажми бўйича энг йирик битим 16 декабр куни “Qishloq qurilish bank” АТБ акциялари билан 197,8 млн сўмлик савдоларда қайд этилди.

Ҳафта давомида қуйидаги беш АЖ бўйича савдолар етакчи бешталикка кирди: “Qishloq qurilish bank” АТБ (биржа айланмасидаги улуши – 47,6%), “Sirdaryo Vino” АЖ (21,9%), “O’zsanoatqurilishbank” АТБ (13,3%), “Marg''ilon Fayz savdo kompleksi” АЖ (9,1%) ва “Hamkorbank” АТБ (5,5%). Уларнинг ялпи ҳажми биржа ҳафталик айланмасининг 97,3% ташкил этди.

Йил бошидан бери “Тошкент” РФБ қимматли қоғозлар билан 2837 битимлар тузилиб, қиймати 260,2 млрд сўмлик акциялар сотилди. Савдоларда 131 эмитентнинг 640,3 млн дона қимматли қоғозлари сотилди.

Тармоқ кесимида банк соҳаси етакчилик қилиб, унинг улуши биржа айланмасининг 56,8% ташкил қилди (147,8 млрд сўмдан ортиқ).