“Бир ойна” маркази хизматларидан Ўзбекистон Ягона портали орқали фойдаланиш мумкин

Тошкент. 23 феврал. ЎзТАГ – Ўзбекистон Ягона интерактив давлат хизматлари порталида “Бир ойна” марказининг паспортлар, намунали шакллар ва бланклар бўйича давлат хизматлари бўлинмаси очилди, деб хабар беради Ўзбек телеграф агентлиги (ЎзТАГ).

Бу ҳақида “Электрон ҳукумат” тизимини ривожлантириш маркази маълум қилди.

Ҳукумат қарорига мувофиқ, “Бир ойна” марказининг асосий вазифаларига “Бир ойна” принципи бўйича давлат хизматлари кўрсатиш, тадбиркорлик субъектлари томонидан олинаётган рўйхатдан ўтиш хизматлари, рухсат берувчи ва лицензион тартиблар шаффофлигини таъминлаш, тадбиркорлик субъектларига ахборот кўмаги бериш кабилар киритилган.

Эндиликда ариза берувчи “Бир ойна” маркази орқали давлат хизматлари кўрсатиш ҳақида шахсан ёки почта алоқаси орқали мурожаат қилади ёки Ягона портал орқали автоматик равишда йўналтиради.

Ариза Ягона портал орқали жўнатилган тақдирда у автоматик тарзда рўйхат рақами берилган ҳолда рўйхатдан ўтказилади.

Бундан ташқари, ариза берувчидан аризани қабул қилиш учун қўшимча маълумот ва хужжатлар талаб қилиш таъқиқланади.