Биринчи чоракда Ўзбекистон суғурта компаниялари мукофотлар йиғишни 22,4% кўпайтирдилар

Тошкент. 18 май. ЎзТАГ – 2016 йилнинг биринчи чорагида Ўзбекистон суғурта компаниялари мукофотлар йиғишни 22,4% кўпайтирган ҳолда, 163,9 млрд сўмга етказдилар, деб хабар беради Ўзбек телеграф агентлиги (ЎзТАГ).

“Мукофотлар тўплаш бўйича ижобий динамика кўпчилик суғурта компанияларида кузатилди. Ҳаётни суғурталаш соҳасида ишлаётган ширкатлардаги тушумнинг ошганини ҳам таъкидлаш зарур. Хусусан, ушбу соҳада фаолият юритаётган уч компания кўрсатилган муддатда 12,6 млрд сўм миқдорда суғурта мукофотлари йиғдилар. Бу эса ўтган йилнинг муқобил давридагига қараганда 75,6% кўпдир”, - деб таъкидлашди Молия вазирлигида.

Кўнгилли суғурта бўйича мукофотлар 21,9% ўсиб, 107,5 млрд сўмга, мажбурий суғурта бўйича йиғилган мукофотлар эса 23,8% кўпайиб, 56,4 млрд сўмга етди.