Бош вазирнинг виртуаль қабулхонасига 2120 мурожаатнинг 870таси телекоммуникация хизматларига тааллуқли
Тошкент. 29 декабр. ЎзТАГ - Бош вазирнинг виртуаль қабулхонасига 2120 мурожаатнинг 870таси телекоммуникация хизматларига тааллуқли, деб хабар беради Ўзбек телеграф агентлиги (ЎзТАГ).
Хусусан, Ўзбекистон Бош вазирининг виртуаль қабулхонаси орқали 2120та мурожаат йўлланган бўлиб, улардан 870тасида телекоммуникация хизматларини кўрсатишга оид масалаларга таалуқли.
Шикоятларда аҳоли вакиллари асосан стационар телефонга уланиш муаммосини кўтариб чиққанлар. Яъни, хонадонларига телефон улаш истагида ариза берган аҳоли вакилларининг сўрови кўп ҳолларда ортиқча бюрократик тўсиқлар ҳамда техник масалаларни ҳал қилиш билан боғлиқ сусткашликлар туфайли кечиктирилмоқда.
Симли телефон алоқасига уланган абонентлар эса ноқулай об-ҳаво шароитида алоқа сифати сезиларли даражада тушиб кетишига сабаб бўлувчи, шунингдек, маънан эскирган мисли алоқа тармоқлари, алоқадаги тез-тез узилишлар боис кўрсатилаётган хизматларнинг қониқарсиз эканлигидан шикоят қилишмоқда.
Эслатиб ўтамизки, 2016 йилнинг 1 январидан 20 декабригача Ўзбекистон Ахборот технологиялари ва коммуникацияларини ривожлантириш вазирлигига 3185 мурожаат келиб тушган. Таҳлил уларнинг кўпчилиги телекоммуникация хизматлари сифатига тегишлилигини кўрсатмоқда.
