Браво Роналдуни 3:0 ҳисобида енгди
Тошкент. 29 июн. ЎзТАГ – Тулқин Ташимов. Чили термасининг дарвозабони Клаудио Браво Португалия термаси хужумчиси Криштиану Роналдуни 3:0 ҳисобида енгди, деб хабар беради Ўзбек телеграф агентлиги (ЎзТАГ) Конфедерациялар кубогининг Россияда бўлиб ўтган биринчи яримфинал учрашувидан кейин.
Тўғри, баъзи ўқувчиларда бу гап таажжуб уйғотиши мумкин. Аслида Браво дарвозасига ўйиндан кейинги пенальтилар сериясида португаллияликлардан Рикарду Куарежма, Жоау Моутиньо ва Нанилар тўп кирита олишмади, айни пайтда чилилик Артуро Видаль, Чарлес Арангис ва Алексис Санчеслар Руй Патрисиу қўриқлаётган дарвозани аниқ нишонга олишди.
Бироқ…
Айнан ушбу ўйин жуда муҳим бўлган Португалия термаси хужумчиси Криштиану Роналдуга жуда катта масъулият юкланган эди. Айнан КриРодан футбол мўжизаси кутилаётган эди. Токи ишқибозлар гўзал ўйиндан баҳра олишсин!
Криштиану ҳаракат қилмади, дейиш қийин. Тўплар ҳам оширди, ўзи ҳам тепди, қанотларни ҳам алмаштирди, майдонга Куарежма чиққач, марказий хужумчига айланди. Катта ҳисобда Чили термаси ҳимояси дунёнинг энг кучли ўйинчиларидан бирини бартараф қилишга эришди, деса бўлади. Аниқлаштираманки, дунёнинг энг кучли ўйинчиларидан бирини – чунки бу орада Месси ҳам борлигини эсдан чиқармайлик.
Чили термаси юлдузлари Видаль ва Санчес кези келганда таниқли рақибидан ҳам кескинроқ ҳаракат қилишди. Уларнинг тез югургани, аниқ тўп етказиб беришлари, алдовчи финтлари, дарвозага йўлланган зарбаларини мақтаса арзийди. Айниқса, чилиликлар асосий вақтда 0:0 ҳисоби қайд этилганидан кейин қўшиб берилган икки қўшимча таймда катта устунликка эга бўлишди. Хусусан, 113-дақиқада португаллияликлар жарима майдонида Санчесни йиқитишганидан кейин ҳакам пенальти белгилаши керак бўлган, ёхуд, 119-дақиқада Видалнинг жарима чизиғидан кучли зарбасидан сўнг тўп штангага теккан, Мартин Родригеснинг қайта зарбасидан сўнг юқори тўсинга теккан пайтларда.
Тўғрисини айтсак, камтарин қулингиз Португалия ва Роналдуга ишқибозлик қилди. Айнан шу ўйинда Криштиану бутун борлиғи билан футбол чиройини намойиш этадигандай туюлган эди. Ҳатто Португалия ютиб олган сўнгги Евро доирасида Хорватияга ишқибозлик қилганига, қачон Роналду ва Ко турнирдан “учиб” кетишини кутганига қарамасдан.
Биринчи яримфинал учрашувининг бутун жозибаси ҳам шундаки, Видаль, Санчес ва Чили ўтган ажойиб 120 дақиқа давомида менинг ишқибозлик мухаббатимни қозона олишди.
Тан олиш керакки, Португалия термасининг бош тренери Фернанду Сантуш Чили мураббийси Хуан Антонио Пиццини тактик жиҳатдан юта олмади. Мақола бошида ёзганим каби, Чили термасининг дарвозабони Клаудио Браво Португалия термаси хужумчиси Криштиану Роналдуни 3:0 ҳисобида енгди.
