Британия кенгаши Ўзбекистонда янги лойиҳани бошламоқда
Тошкент. 27 январ. ЎзТАГ – Британия кенгаши ва Буюк Британиянинг Ўзбекистондаги элчихонаси Ўзбекистонда янги Research is GREAT лойиҳасини амалга оширишни бошлади, деб хабар беради Ўзбек телеграф агентлиги (ЎзТАГ).
“Лойиҳа Буюк Британия ва Ўзбекистон ўртасида тадқиқотлар, илмий лойиҳаларни режалаштириш ва амалга оширишга янгича ёндашувлар, ўқув юртлари, тадқиқот марказлари ўртасида алоқалар ўрнатишга йўналтирилган”, - деб таъкидлашди элчихонада.
“Британиянинг Great Challenge Fund жамғармаси кўмагини олган ушбу лойиҳа мамлакатларимиз орасидаги ҳамкорликнинг муҳим бўғини бўлади. Лойиҳа Буюк Британия ва Ўзбекистон ўртасида илмий тадқиқотларнинг сифатини таъминлашга катта ҳисса қўшади”, - деб таъкидлади Буюк Британиянинг Ўзбекистондаги элчиси Кристофер Аллан.
Лойиҳанинг илк босқичида Британия кенгаши турли фан вакиллари бўлган 30 тадқиқотчи учун илмий тадқиқотларни бошқариш ва АКТ фойдаланиш бўйича семинар-тренинглар ўтказади. Семинарлар Британия кенгашининг олимлар ва университет бошқарувчилари учун Researcher Connect дастурининг бир қисмидир.
Дастур ўзбек тадқиқотчиларига жаҳон илмий ҳамжамиятида ўз ўрнини эгаллаш, самарали ҳамкорликни йўлга қўйиш, тадқиқотлар натижаларини тақдим этиш кабиларга ёрдам бериши кутилмоқда.
Лойиҳанинг кейинги босқичлари тадқиқотчиларнинг британ университетлари билан ҳамкорликни йўлга қўйиш учун Буюк Британияга ташрифини, шунингдек, Тадқиқот ва инновациялар бўйича республика конференцияси ўтказишни кўзда тутади. Ушбу тадбирда таълим ташрифлари якунлари тақдим этилиб, ўзбек ва британ олим ва университетлари ўртасида ҳамкорликни мустаҳкамлаш бўйича кейинги чоралар муҳокама қилинади.
