Бугун Денис Истомин Дуди Села билан АТР Open Sud de France турнири чоракфиналига чиқиш учун беллашади

Тошкент. 5 феврал. ЎзТАГ – Бугун Ўзбекистоннинг биринчи ракеткаси Денис Истомин Исроиллик теннисчи Дуди Села билан соврин жамғармаси $560,152 минг бўлган АТР Open Sud de France турнири чоракфиналига чиқиш учун беллашади, дея хабар беради Ўзбек телеграф агентлиги (ЎзТАГ). Ушбу турнир 2015 йилнинг 2-8 феврал кунлари бўлиб ўтмоқда.

Ўйин бугун тошкент вақти билан соат 23.00 бошланиши керак. Учрашув ғолиби кейинги босқичда француз Ришару Гаскега қарши майдонга тушади. Ўз навбатида у иккинчи босқичда ватандоши Лукас Пуйени 6:3, 7:6 (8:6) ҳисобларида енгган эди.

Истомин ва Села бундан олдин 2010 йил 5 январда бир маротаба Chennai Open турнирида учрашишган. Ушбу ўйинда исроиллик спортчи 6:1, 6:2 ҳисобида ғалаба қозонган эди.

Қайд этиш зарурки, иккинчи босқичнинг Монпельедаги саккиз учрашувидан бештаси французлар иштирокида бўлиб ўтиб, улардан учтасида – француз дербиси бўлади. 2014 йилда турнирда француз Гаэль Монфис ғолиб бўлган эди.

Маълумот ўрнида, турнирнинг биринчи даврасида Истомин Тунис вакили Малек Жазирий билан учрашган эди. Лекин тунислик теннисчи биринчи сетда 6:3 ҳисобида ғалаба қозонганидан кейин ўйинни давом эттиришдан бош тортди ва ўйин тўхтатилди.

Open Sud de France (Жанубий Франциянинг очиқ чемпионати) – қаттиқ қопламали ёпиқ кортларда бўлиб ўтадиган халқаро эркаклар профессионал теннис турниридир.

2009 йилдан бери турнир ATP 250 турнирлари тоифасига киради. Турнир жадвали яккалик 28 ўйинчи ва 16 жуфтликка мўлжалланган.