Бугун Тошкентда қиличбозлик турнири бошланди

Тошкент. 5 ноябр. ЎзТАГ – Бугун соат 12:00да тошкентдаги “Пахтакор” стадионининг ихтисослашган қиличбозлик залида Франциянинг Ўзбекистондаги элчиси 2-кубоги учун қиличбозлик мусобақалари бошланди, дея хабар беради Ўзбек телеграф агентлиги (ЎзТАГ) Франциянинг Ўзбекистондаги элчихонаси сайтига асосланган ҳолда.

Элчихона маълумотларига кўра, рапира, қилич ва шпага бўйича шахсий ва жамоа мусобақаларида бутун республикадан келган ёш қиличбозлар қатнашадилар.

“Иккинчи маротаба ўтказилаётган мусобақалар мамлакатда фаол ривожланаётган ушбу спорт тури бўйича ўзбек-француз ҳамкорлигининг янги босқичи бўлади. 2015 йилнинг апрелида бу ерда ўсмирлар ва кадетлар ўтрасида Жаҳон чемпионати бўлиб ўтади”, – дейилади хабарда.

Эслатиб ўтамизки, турнирнинг ёпилиш маросимида Франция элчиси мусобақа ғолиб ва совриндорларига мукофотлар топширади.

Турнир дастури билан элчихона сайтида танишиш мумкин.