Бугун Тошкентнинг “Бунёдкор” Қатарнинг “Ал-Жаиш” жамоаси билан ўйнайди

Тошкент. 11 март. ЎзТАГ – Бугун кечқурун пойтахтдаги марказий “Пахтакор” стадионида Тошкентнинг “Бунёдкор” клуби Қатарнинг “Ал Жаиш” жамоаси билан Осиё чемпионлар лигасининг иккинчи тури доирасида ўйнайди, деб хабар бермоқдаЎзбек телеграф агентлиги (ЎзТАГ).
“Мен тошкентликларнинг “Ал Фотиҳ” жамоасига қарши ўйинини кўрдим. “Бунёдкор” жисмоний жиҳатдан яхши тайёрланган. Футболчилар бир-бирларини яхши тушунишади. Клуб яхши анъаналарга эга – бу ерда бир неча бразилиялик легионерлар ўйнашган, шу жумладан, Ривалдо, жамоага Зико ва Сколари мураббийлик қилишган. Гуруҳда баҳс жиддий бўлади”, - дея қайд этди қатарликларнинг бразилиялик хужумчиси Нилмар.
“Мен қатарлик футболчиларнинг яхши жисмоний тайёрганлигини қайд этган бўлар эдим. Ўз майдонимизда бўладиган икки ўйинда максимал натижа кўрсатишимиз лозим. Агар очко ола олсак, турнир жадвалидаги мавқеимизни мустаҳкамлаб олар эдик”, - деб айтиб ўтди “Бунедкор” бош тренери Миржалол Қосимов.
Эслатиб ўтамиз, Осиё чемпионлар лигасининг биринчи гуруҳ босқичида “Бунёдкор” Саудия Арабистони чемпиони “Ал Фотиҳ” билан 0:0 ўйнади. Унинг гуруҳдаги рақиблари - “Ал Жаиш” ва “Фулад” (Эрон) ҳам дуранг ўйнашди.
Иккинчи давра олдида барча жамоалар биттадан очкога эга.