Бухарестдаги турнирнинг биринчи раундида Ўзбекистоннинг биринчи ракеткаси АТР рейтинги учинчи юзлигига кирувчи теннисчи билан учрашади

Тошкент. 21 апрел. ЎзТАГ – Бухарестдаги турнирнинг биринчи раундида Ўзбекистоннинг биринчи ракеткаси Денис Истомин АТР рейтинги учинчи юзлигига (289-) кирувчи хорват Никола Мектич билан учрашади, дея хабар беради Ўзбек телеграф агентлиги (ЎзТАГ).

Ҳозирда ўзбексистонлик теннисчи АТР рейтингида 65-ўринда, 2012 йил охирида эса 33-бўлган. Хорват спортчисининг энг яхши натижаси эса 213-ўрин (2013 йилнинг май ойида).

Агар Д.Истомин хорватни енгса, кейинги раундда 29 ёшли испан теннисчиси Даниэл Химено-Травер (АТР рейтингида 68-ўрин) билан кортга тушади. Уни ҳам енгса, чорак финалда ҳамюртимиз франциялик теннисчи Жил Симонга (13-) қарши майдонга тушади.

МДҲ мамлакатларидан ушбу турнирда россиялик Михаил Южный, қозоғистонлик Андрей Голубев ва украиналик Сергей Стаховскийлар қатнашмоқдалар. Россиялик теннисчи биринчи раундда румин Мариус Копилни енгди, лекин украин спортчиси хорват Борн Чоричга бой бериб қўйди. Қозоғистонлик теннисчи итальян Симоне Болелли билан энди кортга тушиши кутилмоқда.

Эслатиб ўтамизки, Руминиянинг теннис бўйича эркаклар ўртасида очиқ чемпионати (BRD Năstase Țiriac Trophy) – 1993 йилдан бери Бухарестдаги тупроқли кортларда ўтувчи халқаро теннис турниридир. 2012 йилдан бошлаб мусобақа апрел ойида ўтказила бошланган.