Бухорода халқаро пакетли коммутация марказини кенгайтириш лойиҳасининг босқичларидан бири якунланди

Тошкент. 7 май. ЎзТАГ – Бухорода “Ўзбектелеком” акционерлик компаниясининг халқаро пакетли коммутация марказини (ХПКМ) кенгайтириш лойиҳасининг босқичларидан бири якунланди, деб хабар беради Ўзбек телеграф агентлиги (ЎзТАГ).

Компания матбуот хизматидан хабар беришларича, мазкур лойиҳанинг биринчи босқичида Бухоро шаҳрида маълумотларни ўтказиш қобилиятини келажакда янада кенгайтириш имконияти билан 40 Гбит/с бўлган ХПКМ янги боғламаси фойдаланишга топширилди.

Лойиҳани амалга ошириш доирасида “Ўзбектелеком” АК Япониянинг NEC корпорацияси ва Toyota Tsusho савдо уйи билан ҳамкорликда бир лямбдада 100 Гбит/с. тезликдаги янги DWDM -линиясини фойдаланишга топширди. Янги линия Республика пойтахти – Тошкентни Ўзбекистоннинг тарихий шаҳарларидан бири Бухоро шаҳри билан боғлади.

Таъкидлаш зарурки, бу Марказий Осиё мамлакатларида 100 Гбит/сгача тезликда ишлайдиган биринчи тизимдир. Мазкур тизимда 10 Гбит/сгача тезликда ишлайдиган анъанавий DWDM-тизимларидан катта фарқ қиладиган энг илғор когерент қабул қилиш ва узатиш технологиялари қўлланилган.

Мазкур лойиҳа магистрал алоқа линиялари ўтказиш қобилиятини ва маълумотлар узатишни бир неча марта оширди, бу эса мамлакатимиз фойдаланувчиларининг интернет-хизматларига ишончли ҳамда юқори тезликда уланишига шароит яратилишига ёрдам беради.

Эслатиб ўтамизки, “Ўзбектелеком” АК – тармоқлари бутун Ўзбекистон ҳудудини қамраб олувчи мамлакатдаги энг йирик телекоммуникация операторидир.