Бухоронинг нефтегаз коллежида Россия кўмагида электрон ўқиш кабинетлари очилди
Бухоро. 29 апрел. ЎзТАГ – Яқинда Бухоро нефть ва газ саноати касб-ҳунар коллежида Россиянинг “ЛУКОЙЛ” компанияси ва “Россотрудничество”нинг Ўзбекистондаги ваколатхонаси кўмагида иккита электрон таълим ўқув хоналари очилди, деб хабар беради Ўзбек телеграф агентлиги (ЎзТАГ).
Ваколатхонадан хабар беришларича, ўқув хоналарининг очилиши маросимида Бухоро ҳокими Валижон Ўринов, коллеж директори Маликжон Муродов, “ЛУКОЙЛ” ташкилий ривожланиш ва хизматни бошқариш департаменти бошлиғи Юрий Пихтовников, “Россотрудничество”нинг Ўзбекистондаги ваколатхонаси раҳбари Виктор Шулика, шунингдек, “ЛУКОЙЛ Узбекистан Оперейтинг Компани”, “Ўзбекнефтгаз” ва бошқа ташкилотлар вакиллари иштирок этдилар.
“Ўқув хоналари, шу жумладан, “ЛУКОЙЛ“ компанияси ҳисобига жиҳозланган электрон таълим кабинетининг очилиши Бухоро нефть ва газ саноати касб-ҳунар коллежи ҳамда “ЛУКОЙЛ Узбекистан Оперейтинг Компани“ ўртасида фаол ҳамкорлик босқичи бошланганидан дарак беради”, - дея таъкидлади коллеж директори Маликжон Муродов.
Юрий Пихтовниковнинг таъкидлашича, компания Бухоро нефть-газ коллежини биринчи навбати 2018 йилда ишга тушиши режалаштирилган Қандим газни қайта ишлаш мажмуасининг бўлғуси ходимларини тайёрловчи ўқув юрти сифатида кўриб чиқмоқда.
