Чехия ва Ўзбекистон товар айланмаси $90 млндан ошди

Тошкент. 14 октябр. ЎзТАГ – 2013 йилда Чехия ва Ўзбекистон товар айланмаси $90 млндан ошди, дея хабар беради Ўзбек телеграф агентлиги (ЎзТАГ).

Бу ҳақида куни кеча Чехия элчиси Гинэк Пэйха Чехия миллий байрамига бағишланган тадбирдаги нутқида маълум қилди.

Элчининг сўзларига кўра, йирик чех компанияларининг ўзбек бозорига киришга қизиқиши ортмоқда.

У Тошкентга трамвайлар ва Урганчга троллейбуслар етказиб бериш лойиҳалари, “Synecta Praga” чех ширкати томонидан Тошкент иссиқлик электростанияси янги блокини қуриш лойиҳаларини қайд этди.

Элчининг сўзларига кўра, Чехия шаҳар транспорт инфраструктураси, ёқилғи-энергетика комплекси, кимё ва нефтегаз саноати, кўмирчилик, фармацевтика, енгил ва қайта ишлаш саноати соҳаларида ишланмаларини тақдим этишга бундан кейин ҳам тайёр.

Бу йил ташкил этилган “Ўзбек-чех ишбилармонлик иттифоқи” ҳам ҳамкорликка салмоқли ҳисса қўшади, деб умид билдирди Г.Пэйха.

Шунингдек, дипломат Чехия томонидан Қорақалпоғистон Республикаси Нукус шаҳридаги Болалар клиник касалхонасига замонавий тиббий техника беғараз тарзда берилганлигини ҳам таъкидлаб ўтди.

Эслатиб ўтамизки, 28 октябрда Чехия асосий миллий байрами – мустақил Чехословак Республикаси ташкил топган кунни нишонлайди.