Чемпионатнинг энг яхши тўпурари Ўзбекистон Кубоги тақдирини ҳал қилди
Тошкент. 5 декабр. ЎзТАГ – Чемпионатнинг энг яхши тўпурари, “Локомотив” ўйинчиси Марат Бикмаев Ўзбекистон Кубоги тақдирини ҳал қилди, деб хабар беради Ўзбек телеграф агентлиги (ЎзТАГ).
4 декабрда 2017 йилги Ўзбекистон Кубоги финали ўйинида тошкентнинг “Локомотив” ва “Бунёдкор” жамоалари учрашдилар. Ўйин 1:0 ҳисобида якунланди. “Локомотив”га ғалаба келтирган ягона голни 26 гол билан миллий чемпионатнинг энг яхши тўпурари бўлган Марат Бикмаев киритди.
Бундан олдинроқ “Локомотив” олий лига чемпиони ҳам бўлган эди. Ушбу жамоа иккинчи йил қаторасига ҳам миллий чемпионат, ҳам мамлакат кубогини қўлга киритмоқда.
Ўзбекистон Футбол федерацияси матбуот хизмати хабарига кўра, “Локомотив” жамоасига Ўзбекистон Кубогини ОФК Президенти Шайх Салмон бин Иброҳим ал-Ҳалифа ва Ўзбекистон Футбол Федерацияси Президенти Умид Аҳмаджонов топширди.
