Чимён МДҲнинг топ-5 оммавий тоғ курортлари рўйхатига кирди
Тошкент. 19 май. ЎзТАГ – Чимён россиялик туристлар орасида МДҲнинг топ-5 оммавий тоғ курортлари рўйхатига кирди, деб хабар беради Ўзбек телеграф агентлиги (ЎзТАГ).
“ТурСтат” агентлиги тузган топ-5ликка Чимбулоқ (Қозоғистон), Шахдаг (Озарбайжон), Цахкадзор (Арманистон), Чимён (Ўзбекистон) ва Қоракўл (Қирғизистон) оромгоҳлари ҳам кирган.
“Ўзбектуризм” маълумотига кўра, тоғларда фаол дам олиш тоғ сайллари (треккинг), тоғли йўлларда автомашина, велисопед ёки квадроцикл ҳайдаш ёки отда юриш, шунингдек, бассейн, сауна, SPA ҳамда фитнесни ичига олган. Рейтингни тузишда, меҳмонхоналардаги онлайн брон тизими статистик маълумотларидан фойдаланилган.
Таҳлилларга кўра, Чимён Қоракўл билан бирга нархи қиммат бўлмаган дам олиш масканлари деб топилди. Бу ерда яшаш ва овқатланиш ҳаражатлари ҳисобланган ҳолда, бир кунлик ҳордиқ нархи бир кишига $70ни ташкил этди.
Эслатиб ўтамизки, апрелда “ТурСтат” МДҲда гастрономик туризм бўйича оммабоп йўналишлар рейтингини эълон қилган, унда ҳам Ўзбекистон биринчи бешталикка кирган эди.
