Dal Teknik Makina турк компанияси Ўзбекистонда қиймати $250 млнлик яна бир цемент заводи қуради
Тошкент. 25 ноябр. ЎзТАГ – Dal Teknik Makina турк компанияси Ўзбекистонда қиймати $250 млнлик яна бир цемент заводи қуради, деб хабар беради Ўзбек телеграф агентлиги (ЎзТАГ) маҳаллий ОАВ асосланган ҳолда.
Турк компанияси вакили Лина Дюракнинг сўзларига кўра, “Dal Teknik Makina” компанияси ва Олмалиқ тоғ-металлургия комбинати (Тошкент вилояти) Сурхандарё вилоятида янги цемент заводи қуриш бўйича келишув имзолади.
“Биз яна бир завод қуришга келишиб олдик, лойиҳа 2018 йил июлда ишга туширилади”, деб аниқлаштирди Дюрак Тошкентда 24 ноябрда очилган "BusinessCem 2015" халқаро конференция давомида.
Янги завод йилига 1,5 миллион тоннагача цемент ишлаб чиқариш технологик линияларини барпо этишни кўзда тутади. Умумий қиймати $250 млн бўлган лойиҳа Олмалиқ тоғ-металлургия комбинати, Ўзбекистон Республикаси тикланиш ва тараққиёт жамғармаси ҳамда маҳаллий тижорат банкларининг кредитлари ҳисобига молиялаштирилади.
Маҳаллий ОАВ эслатишича, 2014 йил мартда Dal Teknik Makina ОТМК учун Жиззах вилоятида қиймати $114,2 млнлик цемент заводи қурилишини якунлаган. Бу ерда йилига 760 минг тонна портландцемент ва 350 минг тонна оқ цемент ишлаб чиқариш мумкин.
Ҳозирда Ўзбекистонда 8 цемент заводи фаолият юритиб, уларнинг умумий ишлаб чиқариш қуввати 8,64 млн тоннага тенг. Расмий статистикага кўра, 2014 йилда Ўзбекистонда цемент ишлаб чиқариш 2013 йилдагига қараганда 5,1% кўпайган.
