Денис Истомин Дубайдаги АТР турнири биринчи доирасида Михаил Кукушкин билан учрашади
Тошкент. 23 феврал. ЎзТАГ – Ўзбекистоннинг биринчи ракеткаси Денис Истомин Дубайдаги АТР турнири биринчи доирасида Қозоғистон вакили Михаил Кукушкин билан учрашади, деб хабар беради Ўзбек телеграф агентлиги (ЎзТАГ).
Ҳозирда Денис жаҳоннинг 63-ракеткаси бўлса, унинг рақиби – 84- поғонада.
Агар икки спортчининг ўзаро учрашувларини ўрганиб чиқсак, 4:3 ҳисобида ўзбекистонлик теннисчи олдинда эканини кўрамиз. Истомин Кукушкинни тупроқли кортларда 2006 йилда, қаттиқ қопламали майдонда 2011 йилда ва 2014 йилда чимли кортда ва 2015 йил сентябрда яна қаттиқ қопламали майдонда енгган. Михаил эса Денисни 2012 йилда тупроқли кортларда, 2015 ва 2016 йил январ ойларида қаттиқ қопламали майдонда енгган.
Бундан хулоса чиқариш мумкинки, ҳар икки теннисчи деярли бир хил кучга эга.
Улар орасидаги 7 учрашувда 5 тай-брейк қайд этилган. Дубайдаги бу галги баҳсда ҳам қаттиқ кураш бўлиши мумкин.
Турнир фаворитлари сифатида дунёнинг биринчи ва тўртинчи ракеткалари Новак Жокович ва Стэн Вавринкалар кўрилмоқда.
Эслатиб ўтамизки, Дубай теннис чемпионати ҳар йили феврал ойида БААдаги Aviation Club Tennis Centre қаттиқ қопламали кортларида ўтказиладиган профессионал теннис турниридир. 2015 йилдан бери соврини $2 млн бўлган эркаклар турнири ATP 500 сериясига киради. Мусобақа яккаликда 32 ва жуфтликда 16 жуфтга мўлжалланган жадвалга эга.
