Денис Истомин Эрнест Гулбисни енгиб, Дубайдаги ATP турнири иккинчи доирасига чиқди

Тошкент. 24 феврал. ЎзТАГ – Ўзбекистоннинг иккинчи ракеткаси Денис Истомин латвиялик теннисчи Эрнест Гулбисни енгиб, Дубайдаги соврин жамғармаси $2,504 млнлик Dubai Duty Free Tennis Championships ATP турнирининг иккинчи доирасига чиқди, дея хабар беради Ўзбек телеграф агентлиги (ЎзТАГ).

1 соат 33 минут давом этган бутун ўйин давомида жаҳоннинг 65-ракеткаси Д.Истомин 8 эйс узатиб, 10 брейк-пойнтдан 5тасидан фойдалана олди. Дунёнинг 14-ракеткаси Э.Гулбис ҳисобида 5 эйс, 11 иккилик хато ва 2 брейк мавжуд. Натижада ҳисоб 7:5, 6:2 шаклида ўзбекистонлик теннисчи фойдасига якунланди.

Шахсий учрашувлар бўйича ҳисоб 2:2.

Чоракфиналга чиқиш учун ўзбек теннисчиси Сергей Стаховский (Украина) – Лукаш Росол (Чехия) баҳси ғолиби билан беллашади.

Эслатиб ўтамизки, Dubai Duty Free Tennis Championships теннис турнири қаттиқ қопламали очиқ кортларда ўтказилади. Турнир 23 февралда бошланди ва жорий йилнинг 28 февралига қадар давом этади.