Денис Истомин Roland Garrosнинг биринчи босқичидан ўтди

Тошкент. 30 май. ЎзТАГ – Бир оз олдин Ўзбекистоннинг биринчи ракеткаси Денис Истомин Франция очиқ чемпионати – Roland Garrosнинг биринчи босқичидан ўтди, деб хабар беради Ўзбек телеграф агентлиги (ЎзТАГ).

Дунёнинг 80-ракеткаси бўлган ўзбек спортчиси америкалик Эрнесто Эскобедони (АТР рейтингида 75-) 7:6, 6:3 ва 6:4 ҳисобларида енгди.

“Катта дубулға” турнирининг иккинчи босқичида у Сэм Куэрри (28, АҚШ) – Хен Чон (67, Корея Республикаси) иккилиги ғолиби билан беллашади.

Турнир етакчилари орасида британиялик Энди Маррей (1), серб Новак Жокович (2), швейцар Стэн Вавринка (3) ва испан Рафаэль Надаль (4) бор.

Маълумки ўтган йилги Roland Garros финалида омад Жоковичга кулиб боққан, у   Маррейни 3:1 ҳисобида енгган эди.

Tennis.com маълумотига кўра, Roland Garros-2017нинг соврин жамғармаси 36 млн евро, бу эса ўтган йилдагидан 4 млн (12%) кўп.

Эркаклар ва аёллар ўртасида турнир ғолиблари 2,1 млн евродан оладилар. Биринчи тўрт босқичда чиқиб кетадиган теннисчилар совринлари 16% кўпаяди.

Франция очиқ чемпионати Roland Garros – тўртта Катта дубулға турнирларининг биттаси бўлиб, Париждаги (Франция) Roland Garros кортларида ўтказилади. Икки ҳафта давомида тўққиз йўналишда ғолиблар аниқланади.

Турнир ташкилотчиси – Француз теннис федерацияси. Ўйинлар тупроқли кортларда ўтказилади.