Денис Истомин Уинстон-Сэйлем турнирини Дональд Янг билан учрашувдан бошлайди

Тошкент. 24 август. ЎзТАГ – Ўзбекистоннинг биринчи ракеткаси Денис Истомин Уинстон-Сэйлемдаги АТР турнирини Дональд Янг билан учрашувдан бошлайди, деб хабар беради Ўзбек телеграф агентлиги (ЎзТАГ).

Қизиғи, АТР рейтингида улар кетма кет жойлашган: Истомин ҳозирда жаҳоннинг 69- ракеткаси бўлса, Янг – 68-поғонада.

Турнир сеткасида Томми Хаас, Эрнест Гулбис, Виктор Троицки, Жиль Симон ва Жо-Вильфрид Тсонга каби таниқли теннисчилар ҳам бор.

Истомин-Янг баҳси ғолиби Федерико Дель Бонис-Симоне Болелли жуфтлиги ғолиби билан кортга тушади.

Эслатиб ўтамизки, Уинстон-Сейлем Очиқ чемпионати шу номли шаҳардаги қаттиқ кортларда ўтказиладиган эркаклар халқаро профессионал теннис турнири. У АҚШдаги Уэйк-Форест университетида ёз ойларида бўлиб ўтади. Соврин жамғармаси $598 минг бўлган мусобақа 2011 йилдан бери ATP 250 сериясига киради. Турнир яккаликда беллашувчи 48 спортчига мўлжалланган.

Мусобақанинг яккалик соврини US Open Series ҳисобига кириб, АҚШ Очиқ чемпионати турнирлари сериясини якунлайди.