Дэвис Кубогининг Жаҳон гуруҳига чиқиш учун Ўзбекистон термаси ўз майдонида америкаликларни енгиши зарур
Тошкент. 15 сентябр. ЎзТАГ – 18-20 сентябр кунлари Тошкентдаги Республика олимпия захиралари коллежи теннис мактаби кортида Ўзбекистон ва АҚШ терма жамоалари ўртасидаги Дэвис Кубоги (World Group) Жаҳон гуруҳига чиқиш учун ўйинлар бўлиб ўтади, деб хабар беради Ўзбек телеграф агентлиги (ЎзТАГ).
“Ушбу беллашув Ўзбекистон термаси учун жамоалар ўртасидаги жаҳон чемпионатининг олий лигасига чиқиш йўлида саккизинчи уриниш бўлади. Ўзбек теннисчиларига икки марта: 1998 ва 2014 йилларда австралияликлар қарши турган бўлса, қолган йилларда улар Чехия (1999), Нидерландия (2000), Сербия (2009), Испания (2001) ва Қозоғистон (2012) терма жамоаларини енга олмаган эди. Шу билан бирга, ўзбекистонлик теннисчилар худди шунча марта Осиё ва Океания зонаси биринчи гуруҳининг турнир жадвалида етакчилик қилган эдилар”, - дейилади Ўзбекистон Теннис федерацияси сайтидаги хабарда.
Мамлакат терма жамоасининг Пётр Лебедь сардорлигидаги таркиби ўзгармагани ҳам айтиб ўтилган. “Унга ҳамон Денис Истомин етакчилик қилмоқда, Фаррух Дўстов эса жамоага фаол кўмаклашмоқда. Кортга ёш теннисчилар — 20 яшар Темур Исмоилов ва 21 яшар Санжар Файзиев чиқишга ҳозирлик кўрмоқдалар” – деб таъкидланади хабарда.
Ўз навбатида, АҚШ жамоаси сардори, машҳур Жим Курье ўйинчилар таркибини ўзгартирди.
“Биринчи ракетка ҳисобланган Жон Изнер ўрнига ҳам яккалик, ҳам жуфтлик баҳсларида бирдай яхши ўйнайдиган Жэк Сок кортга чиқади. У якка баҳсларда кучли теннисчилар рейтингида 28-ўринни, жуфтлик баҳсларида эса 24-ўринни эгаллаб турибди. Маълумот ўрнида, 23 яшар Жек Сок АҚШ термасининг энг ёш ўйинчиси бўлиб, жамоа таркибида илк марта ўйнайди. Жаҳон рейтингида 27-ўринни банд этган Стив Жонсон ҳам биринчи марта терма жамоа сафига киритилди. Мос равишда 38- ва 68-ўринларни эгаллаб турган Сэм Куэрри ва Дональд Янг термадаги ўринларини сақлаб қолди. Дональд Янг иккита якка беллашувда ҳам британияликларга ютқазиб қўйган эди. Таркибда эгизак Брайанларнинг йўқлиги кутилмаган ҳол бўлди. Баҳор фаслида Майк ва Боб жуфтликларнинг дунё рейтингининг биринчи поғонасини эгаллаб турган эдилар”, - дейилади хабарда.
