Дмитрий Шокин Ўзбекистон тарихида биринчи марта таэквондо бўйича жаҳон чемпиони бўлди

Тошкент. 18 май. ЎзТАГ – Дмитрий Шокин Ўзбекистон тарихида биринчи марта таэквондо бўйича жаҳон чемпиони бўлди. У ушбу мақомни Челябинскдаги жаҳон биринчилигида қўлга киритди, деб хабар беради Ўзбек телеграф агентлиги (ЎзТАГ).

МОҚ хабар қилишларича, Д.Шокин энг оғир вазн тоифасида драматик баҳсда ярим финалда кубалик Робелис Деспейнни мағлуб этди. Финал беллашувида спортчи Кот-д’Ивуарлик Фирмен Зоку билан учрашди. Жанг натижаси сўнгги дақиқаларгача маълум эмас эди. Ғолиб ўзбекистонлик спортчи учун омадли келган қўшимча тўртинчи раундда аниқланди.

Қайд этиш зарурки, 2015 йилги Жаҳон чемпионатининг олтинчи куни Ўзбекистон жамоаси учун триумф билан якунланди. Жамоа бир кечанинг ўзида бир олтин ва бир кумуш медални қўлга киритди. Ўзбекистонлик Жасур Бойқузиев финал баҳсида озарбайжонлик Радик Исаев билан жангга тушиб, кумуш медал билан чегараланди.

Бугун 2015 йилги Жаҳон чемпионатининг энг сўнгги медаллар комлектлари ўйналади. Шундан кейин мусобақаларнинг тантанали ёпилиш маросими ўтказилади.

Эслатиб ўтамизки, таэквондо бўйича Челябинскдаги 2015 йилги Жаҳон чемпионати 12 майда бошланган эди.