Дональд Трамп Мирзиёевни Рамазон ҳайити билан табриклади
Тошкент. 28 июн. ЎзТАГ – Америка Қўшма Штатлари Президенти Дональд Трамп Ўзбекистон раҳбари Шавкат Мирзиёевга табрик мактуби йўллади, деб хабар беради Ўзбек телеграф агентлиги (ЎзТАГ).
“Америка халқи номидан Мелания ва мен Сизга ва Ўзбекистон халқига Рамазон ҳайити муносабати билан самимий табрикларимизни йўллаймиз. Муқаддас Рамазон ойида Америка Қўшма Штатларидаги мусулмонлар бутун дунё мусулмонлари қатори имон-эътиқод ва хайр-эҳсон амалларига алоҳида эътибор қаратдилар”, - деб таъкидланади хабарда.
Унинг сўзларига кўра, Америка Қўшма Штатларида мусулмонлар қўшниларга ва жамиятнинг турли табақалари вакилларига ёрдам бериш ҳамда қўллаб-қувватлашдек эзгу анъанани давом эттирган ҳолда, байрамни оила аъзолари ва дўстлар даврасида нишонладилар.
“Мазкур байрамни нишонлар эканмиз, раҳм-шафқат, меҳр-оқибат ва эзгу ният каби фазилатлар аҳамиятини янада теран англаймиз. Шу муносабат билан Америка Қўшма Штатлари Ўзбекистон билан ана шу қадриятларни эъзозлашга қаратилган умумий мажбуриятимизни яна бир бор таъкидлайди”, - дея қайд этди АҚШ президенти.
