ЕИ Ўзбекистондаги янги элчиси расман ўз вазифаларини бажаришга киришди
Тошкент. 20 сентябр. ЎзТАГ – Кеча, 19 сентябрда Европа Иттифоқи делегациясининг Ўзбекистондаги янги раҳбари Эдуардс Стипрайс расман ўз вазифаларини бажаришга киришди, деб хабар беради Ўзбек телеграф агентлиги (ЎзТАГ).
“Латвия ташқи ишлар вазирлигида ишлаганимда бир неча марта Тошкентга ташриф буюрган эдим. Ўшанда ушбу меҳмондўст юртга яна қайтишни орзу қилган эдим. Орзуим ушалганидан жуда хурсандман. Эндиликда Европа Иттифоқи ва Ўзбекистон ўртасидаги муносабатлар ривожига ҳисса қўшишим мумкин. Ўзбек ҳамкорларимиз билан ушбу йўналишда маҳсулдор ишлашимиздан умидворан. Шунингдек, ушбу заминнинг бағрикенг инсонлари билан учрашувларни интизорлик билан кутмоқдаман”, - деб таъкидлади элчи Стипрайс.
Эслатиб ўтамизки, Европа Иттифоқининг хорижий ишлар ва хавфсизлик сиёсати бўйича олий вакили Федерика Могерини Эдуардс Стипрайснинг Европа Иттифоқи делегацияси раҳбари лавозимига тайинлангани ҳақида 2016 йил июлда эълон қилган эди.
Э.Стипрайс ўз фаолиятини Латвия ТИВда 1993 йилда бошлаган. Латвиянинг Буюк Британиядаги элчиси, президент маъмурияти раҳбари, Латвиянинг ЕИ ваколатхонасидаги элчиси вазифаларида ишлаган, Латвиянинг Европа Иттифоқига кириши бўйича музокараларда раҳбар сифатида қатнашган.
Эдуардс Стипрайс Латвия, Украина, Норвегия ва Франция мукофотларига эга. У Латвия университетининг иқтисод факультетини битирган. Франция ва Швецияда ҳам таҳсил олган. Оилали, бир қизнинг отаси. Элчи латиш, инглиз, француз ва рус тилларини билади.
