Эндиликда Ўзбекистонда солиқчилар банк операциялари ўтказишни фақат суд қарорига биноан тўхтатиб қўйишлари мумкин

Тошкент. 8 сентябр. ЎзТАГ – Эндиликда Ўзбекистонда солиқчилар солиқ тўловчиларнинг банк операцияларини ўтказишини фақат суд қарорига биноан тўхтатиб қўйишлари мумкин, дея хабар беради Ўзбек телеграф агентлиги (ЎзТАГ).

Бу ҳақидаги маълумот Norma.uz сайтида жойлаштирилган.

Қонунчиликка киритилган ўзгартишларга мувофиқ, солиқ тўловчи юридик шахс томонидан солиқ ва бошқа молия ҳисоботларини белгиланган муддат тугаганидан кейин 15 кун давомида тақдим этмаслик, солиқ тўловчининг юридик шахснинг кўрсатган манзилида эмаслиги ҳолатларида банк операцияларини ўтказишни тўхтатиб қўйиш фақат суд қарори билан амалга оширилиши мумкин.

Эслатиб ўтамизки, банк ҳисоб-рақамлари бўйича банк операциялари ўтказишни солиқ органи қарорига кўра тўхтатиш имконияти 2009 йил декабрда берилган эди. Ушбу муддатга қадар эса солиқ ва бошқа молия ҳисоботларни тақдим этмаганлик учун ҳисоблар бўйича операцияларни тўхтатиб қўйиш фақат суд йўли билан амалга оширилар эди.