Эрон ТИВ Туркия президентининг яқиндаги баёнотини тушунтириб беришни талаб қилди

Тошкент. 30 март. ЎзТАГ – Туркиянинг Эрон Ислом Республикасидаги ишончли вакили турк етакчисининг Теҳрон ҳудудий сиёсати танқидидан сўнг мамлакат ТИВга чақирилди, дея хабар беради Эрон телеграф агентлиги (ЭрТАГ).

ЭИР ТИВ матбуот котиби Марзия Афхамнинг мамлакат пойтахтидаги брифингда маълум қилишича, турк элчиси Эронда бўлмаганлиги сабабли ташқи сиёсий муассасага Туркиянинг ишончили вакили чақирилиб, ундан президент Режеп Тайип Эрдўғоннинг сўзлари тўғрисида “аниқ ва ишончли” тушунтиришлар талаб қилинган.

“ЭИРнинг ҳудуддаги (Яқин Шарқ ҳудудидаги - ЎзТАГ) стратегик ёндашуви ва унинг қўшнилар билан муносабати тинчликни сақлаш, барқарорлик, ҳамкорлик ва ўзаро ҳурматга қурилган”, - деб таъкидлади Эрон ТИВ вакиласи.

“Аминмизки, Эрон ва Туркия ўртасидаги ҳамкорлик ушбу мақсадларга етиш учун етарли салоҳиятга эга”, - деб қўшимча қилди Афхам хоним.

Олдин хабар қилингани каби, пайшанба кунги чиқишида Туркия раҳбари Ямандаги ҳарбий операция бошланишини изоҳлай туриб, Эрон ҳукуматини ҳудудда ўз устунлигини ўрнатишга уринишда айблади. Айни пайтда у Теҳронни Ямандаги қўзғолончи шиа-хуситларни қўллаб-қувватлашни тўтатишга чақирди ва ушбу араб давлатида ўт олаётган низо аллақачон “секта” характерига кирганлигини таъкидлаб ўтган эди.