ЕТТБ президенти Ўзбекистон ҳукуматининг ислоҳотлар соҳасидаги ҳаракатларини қуллаб-қувватлашга тайёрлигини билдирди
Тошкент. 23 март. ЎзТАГ – Европа тикланиш ва тараққиёт банки (ЕТТБ) президенти Сума Чакрабарти Ўзбекистон раҳбари Шавкат Мирзиеёвга мактуб йўллади, деб хабар беради Ўзбек телеграф агентлиги (ЎзТАГ).
Сума Чакрабарти мактубда ЕТТБ ва шахсан унинг ўзи Ўзбекистон билан янги ҳамкорлик тарафдори эканлигини маълум қилди.
“Ўзбекистон ҳукуматининг мамлакат ва унинг халқи манфаатларига хизмат қиладиган, имкониятларни янада кенгайтириш ва тараққиётни таъминлашга қаратилган ислоҳотларни амалга ошириш борасидаги саъй-ҳаракатларини қўллаб-қувватлашга тайёрмиз. Сизнинг раҳнамолигингизда ишлаб чиқилган 2017-2021 йилларда Ўзбекистон Республикасини янада ривожлантириш бўйича Ҳаракатлар стратегияси ЕТТБнинг кўплаб устувор йўналишлари билан ҳамоҳанг. Стратегияда демократик жараёнлар ва фуқаролик жамиятини мустаҳкамлаш, иқтисодиётни эркинлаштириш, ишбилармонлик муҳити ва қонун устуворлигини такомиллаштириш, шунингдек, қўшни давлатлар билан муносабатларни янада ривожлантириш муҳимлигига алоҳида эътибор қаратилганини таъкидламоқчимиз”, - деб қайд этилади банк президентининг мактубида.
Чакрабартининг сўзларига кўра, Ўзбекистон Республикаси Бош вазирининг биринчи ўринбосари О.Раматов имзолаган Англашув меморандумида қисқа муддатга мўлжалланган ҳамкорлик ёндашуви акс этган. Шу давр ичида ўзбек ҳукуматининг устувор йўналишларини ҳисобга олган ҳолда, Ўзбекистонда ЕТТБнинг мамлакатга доир ўрта муддатли стратегиясини биргаликда ишлаб чиқади.
“Айниқса, кичик бизнес ва хусусий тадбиркорлик ва банк секторини қўллаб-қувватлаш, тезкор самарадорликка эришиш учун инвестиция муҳитини янада яхшилаш бўйича инвестицион, техник ва маслаҳатлашув лойиҳаларимизни қисқа фурсатларда ишга туширишни сабрсизлик билан кутамиз. Шу билан бирга, коммунал хизматлар, инфратузилма, энергетика ва бошқа соҳаларда узоқ муддат тайёргарликни талаб этадиган лойиҳаларни ҳам ишлаб чиқамиз”, - деб таъкидлади Сума Чакрабарти.
