ЕТТБ “Ўзбекэнерго”га Толимаржон ИЭСни кенгайтиришга $240 млнлик кредит ажратади

Тошкент. 15 январ. ЎзТАГ – Европа тикланиш ва тараққиёт банки (ЕТТБ) “Ўзбекэнерго” компаниясига Толимаржон иссиқлик электростанциясини (ИЭС) кенгайтиришга $240 млнлик кредит ажратади, деб хабар беради Ўзбек телеграф агентлиги (ЎзТАГ).

ЕТТБ матбуот хизмати маълумотларига кўра, бу банкнинг Ўзбекистондаги энг йирик кредитидир. Маблағлар Толимаржон электростанциясига (ИЭС) энг камида 900 МВт қувватга эга газ турбиналарини ўрнатиш ҳамда тегишли инфратузилмаларни яратишга йўналтирилади.

Қайд этилишича, “Ўзбекэнерго” лойиҳасининг бошланғич қиймати миллиард доллар атрофидани ташкил этиб, 2023 йилга бориб камида 900 мегаваттлик яна икки газбуғ қурилмаларини ўрнатишни кўзда тутади. ИЭСнинг умумий қуввати 2,6 минг МВтгача ошади.

Лойиҳани молиялаштиришда Осиё тараққиёт банки (ОТБ) ҳамда Ўзбекистон Тикланиш ва тараққиёт жамғармаси ҳам иштирок этади. 2017 йил охирида Ўзбекистон ОТБдан лойиҳани амалга ошириш учун $450 млн кредит олган эди.

Эслатиб ўтамиз, Ўзбекистон энерготизимида умумий қиймати 12,4 минг МВтлик 48 та электростанция мавжуд бўлиб, шу жумладан, “Ўзбекэнерго”нинг 10 иссиқлик электростанцияларининг қуввати 10,6 минг МВтга тенг.

 

Сурат манбаи: http://www.for.kg