“Euronews” телеканалида Бухоро ва унинг ҳунармандлари тақдим этилди
Тошкент. 19 ноябр. ЎзТАГ – 17 ноябрда дунёнинг таниқли телеканалларидан бўлган “Euronews”да “Uzbekistan life” дастурининг “Ўзбекистон ҳаёти: Зардўзлик, ҳунармандчилик ва Бухоро гиламлари” деб номланган янги қисми эфирга узатилиши бошланди, деб хабар беради Ўзбек телеграф агентлиги (ЎзТАГ).
Ушбу кўрсатув “Euronews” ахборот агентлиги ва “Ўзбектуризм” МК ҳамкорлигида тайёрланмоқда.
“Ўзбектуризм” МК маълум қилишларича, ушбу сюжетда “Life” дастури бошловчиси гилам тўқувчи аёл хонадонида меҳмон бўлиб, Бухоро гиламларининг яратилиш сирлари ҳақида ҳикоя қилган.
Бухоро шаҳри ўзининг олтини ва ипаги, кулолчилиги, гиламлари ва безаклари билан машҳур. Шаҳар Буюк Ипак йўлининг марказида жойлашган. Бу ерда турли ҳунарманлик намуналари қадимдан ривожланган.
Масалан, кулолчилик кўҳна ҳунарлардан бўлиб, ушбу шаҳар тарихида ҳам сезиларли ўрин эгаллаган. Кулолчилик ва сополга ишлов бериш усуллари кўплаб асрлар мобайнида ўзгармасдан, авлоддан авлодга ўргатиб келинган ва кулоллар фақат маҳаллий тупроқ ва бўёқлардан фойдаланиб келишмоқда.
Ўзбекистонда мустақил кулолчилик санъати мактаблари бир нечтани ташкил қилади ва ҳар бир мактаб ўзининг бетакрор услуби, чизмалари, шакли ва ранглар танлови билан бошқаларидан ажралиб туради. Олимларнинг фикрича, Бухоро мактабига хос бўлган юздан ортиқ нақшлар борлиги аниқланган.
Яқинда “Euronews” каналида 2500 йил тарихга эга қадимий Термиз шаҳри меъморчилигига бағишланган фильм намойиш этилади.
Эслатиб ўтамизки, “Euronews” агентлиги 13 тилда эфирга чиқади ва дунёнинг 155 малакатдаги 370 млндан ошиқ мухлисларни қамраб олган.
