“Euronews” Ўзбекистоннинг туристик шаҳарларига бағишланган роликни кўрсатишни бошлади

Тошкент. 3 сентябр. ЎзТАГ – “Euronews” телеканалида Самарқанд, Бухоро ва Хива туристик шаҳарларига бағишланган 30-секундлик роликни кўрсатишни бошлади, деб хабар беради Ўзбек телеграф агентлиги (ЎзТАГ).

“Ролик европалик томошабинларга 2016 йилнинг мартигача ушбу шаҳарлардаги одатдаги туристик маршрутларда четда қоладиган ноёб обидаларни намойиш қилади. Шу билан бирга, “Le Mag” рубрикасида телеканал яқинда Самарқандда бўлиб ўтган “Шарқ Тароналари” халқаро мусиқа фестивалидан репортаж олиб кўрсатди”, – деб таъкидлашди “Ўзбектуризм” МК.

Бундан ташқари, “Euronews” эфирида “Сity-tour” дастури доирасида Тошкентнинг туристик жойлари ҳақидаги репортаж ҳам кўрсатилмоқда. Ўтган йилда эса Самарқанд, Бухоро ва Хивага бағишланган учта катта кўрсатув эфирга чиқан эди.

“Euronews” дунёнинг 155 мамлакатларида 13 тилда кечаю-кундуз маданий, илмий ва бошқа кўрсатувлар намойиш қилади.