Евро-2016: Бугун Рональдунинг ўйинини кўриш учун кўпчилигимиз тун соат 2гача ухламаслигимизга тўғри келади

Тошкент. 14 июн. ЎзТАГ – Тўлқин Ташимов. Бугун  Португалия термаси хужумчиси Криштиану Рональдунинг ўйинини кўриш учун кўпчилигимиз тун соат 2гача ухламаслигимизга тўғри келади.

Соат 21.00да Бордодаги “Стад-де-Бордо” стадионида Австрия ва Венгрия куч синашади. Кўпчилик ушбу термалар ўйинини умуман кўрмаганига аминман, лекин кўпчилик Габор Кирая (Венгрия) ҳақида эшитган, деярли барча Александр Драгович ва Давид  Алабани (ҳар иккиси Австриядан) билади.

Ўйин олдидаги тахминларга кўра, Австриянинг имкониятлари юқори. Евро-2016 турнирига у Швеция ва Россия билан бир гуруҳдан чиқди ва ўн ўйиндан тўққизтасида ғалаба қозониб, кейинги босқичга ўтди. Масалан, сафарда австрияликлар Златан Ибрагимович жамоасини 4:1 ҳисобида янчиб ташлаб, саралаш босқичи якунига анча вақт қолганидаёқ гуруҳдаги ғалабасини таъминлаб қўйди.

 Лекин австралияликларга қарши ғалабага ташна бўлган Венгрия ўйнайди. Жамоа кейинги 30 йил ичида биринчи марта Европа биринчилиги финали каби йирик халқаро турнирга йўлланма олди. Саралаш босқичида венгрлар Шимолий Ирландия, Руминия, Финляндия, Фарер ороллари ва Греция билан бир гуруҳга тушди. Учинчи ўринни олган жамоа малака босқичининг плей-офф раундида бир илож қилиб норвегларни енгди ва кейинги босқичга йўл олди.

Рақибларнинг ўзаро учрашувига доир статистика жуда қизиқарли. Масалан, улар ўзаро 137 марта учрашганлар. Австрия 8:2 ва 6:0 ҳисобларида ғалабалар қилган бўлса, Венгрия 6:1, 5:2 ва 6:3 ҳисобларида рақибини мағлубиятга учратган. Жамоаларнинг дуранг билан тугаган ўйини 5:5 ҳисобида якунланган.

Кулгилими?

Ва энг асосийси ўзаро ўйинларда рақиблар бир бирлари дарвозасига 553 гол ёки ҳар ўйинда ўртача 4тадан тўп киритган... Ҳозирча Венгрия ҳисобида 67 ғалаба, Австрияда эса бу кўрсаткич 40та.

Тошкент вақти билан соат 00.00да Сент-Этьендаги “Жоффруа Гишар” стадионида Португалия ва Исландия куч синашади. Ўйин ҳақиқатдан ҳам қизиқарли кечиши мумкин. Биринчидан, Исландия Евро-2016нинг дебютанти. Саралашда у ўз гуруҳида иккинчи ўринни эгаллади ва чемпионатга тўғридан-тўғри чиқди. Лекин ўртоқлик учрашувларида жамоанинг омади чопмади: Норвегияга 2:3  бой бериб, 4:0 ҳисобида Лихтенштейнни енгди. Бу сўнгги ўн ўйиндаги учинчи ғалабаси бўлди. Қолган учрашувларда Исландия фақат мағлубиятга учради. Боз устига, ушбу оралиқда етти ҳолатда дарвозасидан камида иккитадан, тўрт ҳолатда учтадан кам бўлмаган гол ўтказиб юборди. Исландия ўтган ўн ўйинда 20 гол ёки ҳар ўйинда ўртача 2тадан тўп ўтказиб юборди. 

Хуллас, Роналду ва шериклари гол уришда мусобақалашишлари мумкин. Статистика ҳам шундан дарак беради. Деярли икки йилдан бери Португалия дуранг ўйнагани йўқ. Жамоанинг сўнгги дуранг Бразилиядаги жаҳон чемпионатида АҚШ билан қайд этилан (2:2). Ўшандан бери португаллар 21 ўйин ўтказиб, 14 ғалаба қилган ва 7 марта ютқазган.

Эслатиб ўтамизки, Европа чемпионатининг финал турнирида илк маротаба 24 миллий терма қатнашмоқда. Улар олти гуруҳга бўлинган. Гуруҳ турнирининг сўнгги ўйинлари 22 июнда ўтказилади. 1/8 финалга гуруҳларда биринчи ва иккинчи ўринларни олган термалар, шунингдек, учинчи ўринни олган тўртта энг яхши жамоа чиқади. 1/8 финал ўйинлари 25-27 июнда, 1/4 финал ўйинлари 30 июндан 3 июлгача ўтказилади. Яримфинал ўйини 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.