Евро-2016: Бугун турнирнинг энг қизиқарли ўйинлари бўлиб ўтади
Тошкент. 16 июн. ЎзТАГ – Тўлқин Ташимов. Айтиш мумкинки, бугун турнирнинг энг қизиқарли ўйинлари бўлиб ўтади. Англия-Уэльс дербиси мухлисларни бутун ўйин ҳатто қўшимча вақт давомида ҳаяжонга солса, кучли салоҳиятга эга Украина бўйсинмас Шимолий Ирландия билан беллашади, ишончли Германия эса тезкор Польшага дуч келади.
Тошкент вақти билан соат 18.00да инглизлар валлийлар билан куч синашадилар.
Тўғри, Раҳим Стерлинг, Эрик Дайер, Жейми Варди, Маркус Рэшфорд, Уэйн Руни ва Харри Кейн ҳар қандай мудофаани ёриб ўтишга қодирлар (фақат итальянларникидан ташқари...). Ҳозирги Англия термасида ёш талантлар ва тажрибали футболчилар ҳам бисёр. Бу эса, юқори даражадаги футбол намойиш этилишини билдиради.
Лекин Рой Хожсон…
Айнан футбол ватани жамоаси бош тренерининг позицияси кишида кўплаб саволлар туғдирмоқда. Россия билан ўйин ушбу мураббийнинг бутун камчиликларини ойдин қилди. Тактик хатолар, ўйинчиларни жойларига нотўғри тайинлаш, боғланишларнинг йўқлиги бу камчиликларнинг энг қисқа рўйхати дейиш мумкин. Шу сабабли ҳам уни бугунги Англия термаси даражасидаги тренер эмас деса бўлади.
Албатта, Аарон Рэмзи ва Гарет Бэйл словаклар билан ўйиндаги каби инглизлар мудофаасига босим ўтказадилар. Шу сабабли, Харт дарвозаси олдидаги ҳар қандай қоидабузарлик гол билан якунланиши мумкин. Бундан ташқари, ўйин сифати бўйича Крис Коулман шогирдларининг устунлиги кўринмоқда.
Англиянинг ҳам ўз устунлик жиҳатлари бор. Бу ҳақда гапирганда, жамоада кейинги йилларда энг юқори тоифадаги футболчилар жамланганини айтиб ўтиш зарур. Шунингдек, Хожсон оптимал таркибни танлай олиш ва уларни мақбул жойлаштиришнинг уддасидан ҳам чиқиши мумкин.
Соат 21.00да Украина Шимолий Ирландия билан ўйнайди.
Украиналиклар Германияга аламли мағлубиятдан сўнг ғалаба қилишлари зарур. Жамоа бош тренери Михаил Фоменко қанотларда яхши ўйнаётган Евгений Коноплянко ва Андрей Ярмоленколарга тегмаслиги аниқ. Ушбу иккилик Германия билан ўйинда мукамал ўйин кўрсатди. Лекин жамоага голли вазиятларни амалга ошириш панд берди. Шу билан бирга Шимолий Ирландия энг кучсиз ўйин кўрсатган уч жамоа (Россия ва Туркия билан бирга) сирасига киради. Агар Польша билан ўйиндаги каби ирландлар дарвозалари олдига йиғилиб олишса, фалокат юз бериши аниқ. Икки ўйин давомида гол уришда омад келмаслиги эса – мумкин эмас.
Соат 00.00да Германия Польша билан учрашади.
Тўғри, биринчи ўйинда немисларнинг темирбетон мудофааси украин хужумларини йўққа чиқара олди. Мюллер ва шогирдлари ҳар қандай термани енгиши мумкин, лекин поляклар билан бутунлай бошқача ўйин бўлади.
Оддий қилиб тушунтирсак, Милик, Блащиковский ва Клих Роберт Левандовскийга қулай тўп чиқариб беришса бўлди, у эса ҳар қандай вазиятдан голли ҳолат юзага келтириши мумкин. Боз устига, биринчидан, польяк суперфорварди украин термасининг хужумчиларидан кучли, ва шу сабабли катта муаммолар туғдира олади, иккинчидан, “Бавария”да ўйнагани сабабли, немис мудофаасидан қандай ўтиш мумкинлигини яхши билади.
Хуллас, ишқибозларни уйқусиз тун кутмоқда!
Эслатиб ўтамизки, Европа чемпионатининг финал турнирида илк маротаба 24 миллий терма қатнашмоқда. Улар олти гуруҳга бўлинган. Гуруҳ турнирининг сўнгги ўйинлари 22 июнда ўтказилади. 1/8 финалга гуруҳларда биринчи ва иккинчи ўринларни олган термалар, шунингдек, учинчи ўринни олган тўртта энг яхши жамоа чиқади. 1/8 финал ўйинлари 25-27 июнда, 1/4 финал ўйинлари 30 июндан 3 июлгача ўтказилади. Яримфинал ўйини 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.
Чемпионатнинг финал ўйини 11 июлда “Стад де Франс” стадионида бўлиб ўтади.
