Евро-2016: Иккисидан бири: кучли Германия ёки креатив Франция

Тошкент. 5 июл. ЎзТАГ – Тўлқин Ташимов. Эртадан кейин, Марсел шаҳрида тошкент вақти билан соат 00.00да Евро-2016нинг иккинчи яримфинал ўйинида кучли Германия ва креатив Франция майдонга тушади.

Тўғрисини айтсам, немислардан Италия билан ўйиндан кейин жуда кўнглим қолди. Улар итальянлар мудофаасини жисмоний жиҳатдан эзиб, Буффонни жаримадан ташқаридан туриб ўққа тутишлари, қанотлардан ўрта ва олис тўплаб етказиб беришлари  ва рақибни дарвоза яқиниди “жазолаш”лари зарур эди. Лекин, бунинг ўрнига, деярли тенг имкониятларни намойиш қилган оғир ўйин бўлди. Шу сабабли ҳам фақат Нойернинг совуққон характери Германияни сақлаб қолди.

Айни пайтда, Франция, кутилгани каби, Исландияни жуда осонлик билан ютди. Одатда, журналист ва экспертлар ўйин олдидан турли қарашларни илгари сурган ҳолда ўйинга қизиқишни оширишга ҳаракат қиладилар. Шу билан бирга, кўпчилик илғамайдиган жиҳатларни ҳам кўра оладилар. Бир сўз билан айтганда, барчаси шоу учун қилинади. Лейин ўйин олдидан ҳам, у бошланганидан кейин ҳам Франциянинг даражаси Исландияникидан анча юқорилиги маълум бўлди.

Энди, яримфинал олдидан, термаларнинг қайси бири учун 1/4 финал ўйини кўпроқ фойдали бўлгани ҳақида бош қотириш керак.

Германия термасининг бош тренери Йоахим Лев ва унинг шогирдлари “скуадра адзурра” билан ўйинда жуда кўп асаб қувватини сарфладилар, ўйиндан қониқиш билан, лекин эзилган ҳолда чиқдилар. Уларда ўзларини тиклашлари, хатолар устида ишлаш ва Гризманн, Пайет ва Погбага қарши тактика ишлаб чиқиш учун бир қўшимча кун бор  (Франция бир кун кейин ўйнади). Қизиғи шундаки, немислар ҳар қандай муракаккаб ўйиндан янада кучлироқ бўлиб чиқадилар.

Айни пайтда, Франция термаси бош тренери Дидье Дешам ва унинг жамоаси олдида янада мураккаброқ вазифа турибди: Исландияга қарши осон ўйиндан кейин Германиядан кучли термага қарши қийин ўйинга чиқиш. Жамоанинг гуруҳ босқичи ва плей-оффдаги турли даражадаги ўйинлари, тўғрисини айтганда, французлар яримфиналга зарур даражада тайёргарлик билан чиқадиларми, деган саволга ижобий жавоб беришга имкон бермайди.

Лекин ҳаммасини ўйин кўрсатади.

Ўйлайманки, немислар ўйин тақдирини асосий ёки қўшимча вақт давомида ўз фойдасига ҳал қилиш учун ҳамма нарсани қиладилар. Ўйиндан кейинги пенальтилар лотереясида яна бир марта қатнашиш немисларга унча ҳам ёқмаслиги шубҳасиз. Анчагина яхши хужум чизиғига эга бўлган французлар ҳам пенальти тепишга унчалик ҳам ишқибоз эмаслар. Яъни, биз ишқибозларни немисларнинг капитал ўйини французларнинг креатив қуввати билан тўқнаш келувчи ёрқин футбол кутмоқда.

Бироқ…

Бироқ, агар асосий ёки қўшимча вақт давомида дуранг қайд этилса, Еврода кузатилган ҳолатлардан келиб чиқиб, Нойернинг Льорисга нисбатан имкониятларини 60%га 40% деб баҳолаш мумкин.

Ҳозирча…

Эслатиб ўтамизки, Евро-2016нинг чоракфинал ўйинларидан кейин яримфинал иштирокчилар номлари маълум бўлди. Евро-2016нинг яримфинал ўйинларида 6 июлда Лионда Португалия ва Уэльс, 7 июлда Марселда Германия ва Франция термалари беллашадилар. Учинчи ўрин учун ўйин эса умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.