Евро-2016: Инглизлар яхши футбол кўрсатмадилар, Уэльс эса Россияни янчиб ташлади

Тошкент. 21 июн. ЎзТАГ – Тўлқин Ташимов. Инглизлар словаклар билан ўйинда яхши футбол кўрсатмадилар (0:0), Аарон Рэмзи ва Гарет Бэйл жамоаси эса Россияни янчиб ташлади (3:0).

Ўтган кеча бўлиб ўтган Англия-Словакия ва Россия-Уэльс ўйинлари кишида турфа таассуротлар уйғотди.

Олдин ғамгин янгилик тўғрисида.

Кеча ёзганимдек, агар Англия Словакия билан учрашувда яхши ўйнай олмаса, плей-оффда унга ишқибозлик қилмаса ҳам бўлади. Бундан фақат ютасиз: соғлигингиз яхшиланади, асабларингизни сақлаб қоласиз, валидолга пул сарфламайсиз. Бу – энг камида!

Аслида, инглизлар бутун тўқсон дақиқа давомида ёмон ўйнашди, дейиш қийин. Уилшир, Варди ва Старридж вақти-вақти билан креатив футбол намойиш қилишди, лекин, бундан ҳеч қандай самара чиқмади.

Уэйн Руни нега заҳирага чиққанини эса умуман тушуниш қийин.

Образли қилиб айтганда Рой Хожсон ва Англия термасининг ҳикояси каби ғамгин ҳикоя дунёда бўлмаса керак. Плей-оффда жамоа “F” гуруҳидаги иккинчи терма билан учрашади. Бу Венгрия, Исландия, Португалия ёки Австрия бўлиши мумкин. Агар Англия ушбу жамоалардан ҳар қандайи билан Словакия ёки Россияга қарши ўйнаганидай ўйнаса,  Руни ва унинг шерикларига Лондонга чипта буюртириб қўйса бўлади.

Словаклар эса, гуруҳдаги Россияга қарши асосий ўйинни намунали тарзда ўтказиб, бунинг самарасидан баҳраманд бўлишди. Марек Гамшик бир марта Англия термаси жарима майдонига ҳам ёриб кирди, лекин гол ура олмади. Шунгача ва шундан кейин ҳам Словакия дуранг натижа учун ўйнади.

Ва фақат, ўйин бош ҳаками иккинчи таймга беш дақиқа қўшиб берганидан сўнг, бирданига у бундай зерикарли ўйиндан завқ олаётган ягона киши эканлиги маълум бўлди.

Шу билан бирга, Россия термасининг Уэльсга қарши ўйинини шарҳлаш жуда қийин. Кеча ёзганимдай, Слуцкий ва унинг жамоасини фақат мўъжиза қутқариб қолиши мумкин эди.

Мўъжиза эса, юз бермади!

Аарон Рэмзи ва Гарет Бэйл юқори тезликда ҳаракатланган ҳолда, Россия термаси ҳимоячиларини ҳатто пайқамадилар. Ҳатто, ҳимоячилар рақиб хужумчилари атрофида шунчаки чопиб юргандек туюлди. “Реал” хужумчиси эса,  кўп ҳоларда Игорь Акинфеев дарвозасига қайси оёғи билан зарба йўллаши мумкинлигини танлашга ҳам улгурди.

Биринчи таймнинг 11- ва 20-дақиқаларида валлийликлар икки гол киритган ҳолда, ўйинни ўз фойдасига ҳал қилдилар. Бутун биринчи тайм давомида россияликлар футболдан бошқа исталган барча нарса билан шуғулландилар, деса бўлади.

Хуллас, Россия футбол ўйнай олмаслиги аниқ кўриниб турди. Марказий устун вазифасини бажараётган Артем Дзюба, ҳар доимгидай, барчани “фантастик дриблинги” билан чўчитди. Широков бутунлай кўринмай қолди, Смолов очиқчасига зерикиб ўтирган рақиб дарвозабонини уйғотиш мақсадида тўпни бир неча марта Уэльс томонга тепди.

Иккинчи таймда, россияликлардан ҳеч қандай хавф кутиб бўлмаслиги маълум бўлгач, Уэльс термаси тезликни кескин пасайтирди. Бэйлнинг 67-дақиқадаги учинчи голи эса ўйинга нуқта ясади.

Натижада Уэльс гуруҳ босқичини 6 очко билан биринчи ўринда, Англия эса 5 очко билан иккинчи ўринда якунлади. Словакия эса 4 очко билан бошқа гуруҳлардаги ўйинлар тугашини кутмоқда.

Эрталаб эса, Россия термаси бош тренери Леонид Слуцкий истеъфо бергани маълум бўлди. Буни тўғри қарор дейиш мумкин. Чунки, европа ўлчамлари бўйича ҳам катта ойликлар олаётган ўйинчилари бўлган бундай жамоа келажакка эга эмас.

Эслатиб ўтамизки, Европа чемпионатининг финал турнирида илк маротаба 24 миллий терма қатнашмоқда. Улар олти гуруҳга бўлинган. Гуруҳ турнирининг сўнгги ўйинлари 22 июнда ўтказилади. 1/8 финалга гуруҳларда биринчи ва иккинчи ўринларни олган термалар, шунингдек, учинчи ўринни олган тўртта энг яхши жамоа чиқади. 1/8 финал ўйинлари 25-27 июнда, 1/4 финал ўйинлари 30 июндан 3 июлгача ўтказилади. Яримфинал ўйини 6 июлда Лионда ва 7 июлда Марсел шаҳарларида бўлиб ўтади. Учинчи ўрин учун ўйин эса умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.